सात वटा फिल्ममा वर्षा र विपिनको सहकार्य

नेपाली फिल्म क्षेत्रमा पछिल्लो समय नायक दयाहाङ राई र नायिका मिरुना मगरको जोडीको चर्चा हुन्छ । यो जोडीले केही हिट फिल्म दिएपछि दर्शकको नजरमा उनीहरु परेका हुन् ।

तर, फिल्ममा काम गराइको हिसाबमा नायक विपिन कार्की र नायिका वर्षा राउतले दोहोरो ह्याट्रिक गरिसकेका छन् । तर, यो जोडीको अपेक्षित चर्चा हुन सकेको छैन ।
वर्षा र विपिनले फिल्म ‘जात्रा’बाट सहकार्य सुरु गरेका थिए । यसपछि उनीहरुले ‘जात्रै जात्रा र महाजात्रा’मा सहकार्य गरे । यो जोडीको सर्वाधिक हिट फिल्म नै यी तिन फिल्म मानिन्छन् ।

वर्षा र विपिनले ‘गोपी, के घर के डेरा र तेल भिसा’मा पनि सहकार्य गरिसकेका छन् । यी तिनै फिल्म बक्स अफिसमा अपेक्षित सफल भएनन् । अब, यो जोडीले अर्को एक फिल्ममा पनि सहकार्य गर्ने पक्का भएको छ ।

तुलसी घिमिरेको निर्देशनमा तयार हुन लागेको फिल्म ‘पहाड’मा वर्षा र विपिनको जोडीले काम गर्ने पक्का भएको छ । नेपाल र मुम्बइमा खिचिने यो फिल्मको छायांकन केही महिनामै सुरु हुँदैछ । तुलसीले यो फिल्मलाई विशेष मान्दै आएका छन् ।

सात वटा फिल्ममा लगातार काम गरेर विपिन र वर्षाले भने नयाँ रेकर्ड राखेका छन् ।