काठमाडौं– गत असोजको दोस्रो साता नेपाल वायुसेवा निगम (नेपाल एयरलाइन्स) का क्याबिनक्रुले आन्दोलन अवकाश उमेरको हद म्यादको विषयमा आरोप लगाउँदै आन्दोलन गरे । अवकाश हुने उमेर हद ४५ वर्षबाट बढाएर ५० वर्ष पुर्याउनुपर्ने माग राख्दै उनीहरु आन्दोलनमा उत्रिएका थिए । त्यस आन्दोलनका कारण दर्जनौं उडानका हजारौं यात्रु अलपत्र परे ।
निगमले उनीहरुको माग सम्बोधन गरेपछि उडान नियमित गराउन नेपाल एयरलाइन्सले सकेको थियो । यसको दुई महिना नपुग्दै शनिवारदेखि नेपाल एयरलाइन्सको झण्डै आधा दर्जन उडान प्रभावित भए ।
‘बिरामी परेको’ वा ‘अपर्झट भैपरी काम आइपरेको’ भन्दै निगमका झण्डै एक दर्जन पाइलट एकैपटक बिदामा बसेर उडान अलपत्र भएपछि झण्डै एक हजार यात्रु अलपत्र परेका थिए ।
आइतबार साढे ९ बजे काठमाडौंबाट १ सय ६७ यात्रु लिएर दुबई उड्नुपर्ने जहाजको पाइलट नआएपछि निगमले यात्रुहरुलाई गौशालाका होटलमा कोठा खोजेर राखेको थियो । उनीहरुलाई निगमले अन्य पाइलट खोजेर सोमबार गन्तव्यमा पुर्याएको थियो । यसैगरि विभिन्न स्थानमा जानुपर्ने आधा दर्जन उडान प्रभावित भएको थियो ।
निगमसँग दुई वटा न्यारोबडी र दुई वटा वाइडबडी उडानका लागि ४३ क्याप्टेन छन् । जसमा स्थायी सेवामा र करारमा गरि दुई किसिमको सेवामा पाइलटहरु कार्यरत छन् । करार सेवामा रहेका पाइलटहरुको भन्दा आफूहरुको कम सेवासुविधा भएको भन्दै स्थायी सेवामा कार्यरत पाइलटहरुले हड्ताल गरेका हुन् ।
नेपाल एयरलान्सका स्थायी सेवामा कार्यरत पाइलटहरूले मासिक तलबभत्ता ६ लाख हाराहारी पाउँछन् । करार सेवामा कार्यरत विज्ञ पाइलट तथा क्याप्टेनलाई भने निगमले १२ लाख रुपैयाँसम्म तलबभत्ता दिने गरेको आन्दोलनरत पाइलटहरूको गुनासो छ । करार सेवामा कार्यरत कर्मचारीहरुसरह आफूहरुको सेवासुविधा हुनुपर्ने उनीहरुको माग छ ।
यता निगमले भने पाइलटहरूको सेवासुविधाको विषयमा संस्कृति, पर्यटन तथा नागरिक उड्डयन मन्त्रालयमार्फत अर्थमन्त्रालयमा प्रक्रियामै रहेको उल्लेख गरेको छ ।
उडानमा पर्न गएको असरले निगमको आर्थिक नोक्सानी भएको जनाइएको छ । यस्तो कामले निगमको साख र इज्जतमा समेत नकारात्मक प्रभाव परेको भन्दै यसलाई व्यवस्थापनले गम्भीर रुपमा लिएको निगमको भनाइ छ । निगमलाई पर्ने आर्थिकलगायत सम्पूर्ण नोक्सानीको सम्बन्धमा नियमानुसार हुने जनाउँदै सम्पूर्ण पाइलटलाई आ–आफ्नो रोस्टरअनुसार उडान सञ्चालन गर्न निर्देशन दिएको छ ।
प्रतिक्रिया