अघि बढ्यो ‘कबड्डी ५ र जारी २’को काम

फिल्म ‘कबड्डी ५ र जारी २’को काम पनि अगाडि बढेको छ । आउँदो बर्षमा रिलिज गर्ने लक्ष्यका साथ यी दुबै फिल्मको काम अगाडि बढाइएको हो । ‘कबड्डी ४ र जारी’ बक्स अफिसमा ब्लकबस्टर भएका थिए । ‘कबड्डी ४’ले बनाएको रेकर्ड यो बर्ष ‘पुर्ण बहादुरको सारङ्गी’ले तोडिसकेको छ ।

यसैले, यसको निर्माणपक्ष नयाँ रेकर्ड बनाउने दबाबमा छ । वुझिएअनुसार, फिल्म ‘जारी’ रिलिज भएपछि निर्देशकद्धय रामबाबु गुरुङ र उपेन्द्र सुब्बाको सम्बन्धमा खटपट भएको थियो । तर, अब यी दुई फेरि मिलेका छन् ।

यी दुबै फिल्मको निर्माणमा दुबैको सहकार्य हुने पनि पक्का भइसकेको छ । यसैले, यी दुबै फिल्मको काम अगाडि बढाइएको हो । बासुरी फिल्मस्ले अर्को एक फिल्मको कथा पनि अगाडि बढाएको छ ।

वुझिएअनुसार, रामबाबु गुरुङ दशैंमा ‘कबड्डी ५’ रिलिज गर्न चाहन्छन् । तर, दुबै फिल्ममा नायक दयाहाङ राइको मुख्य भूमिका रहने भएकाले उनको समय मिलाएर छायांकन गर्ने तयारी गरिएको छ । दयाको पाइपलाइनमा फिल्मको संख्या लामो छ ।