‘पुर्ण बहादुरको सारङ्गी’को ५० करोडको आँकडामा बाधक बन्न सक्छ ‘पुष्पा २’

फिल्म ‘पुर्ण बहादुरको सारङ्गी’ पाँचौ हप्तामा प्रवेश गरेको छ । बिहिबारबाट पाँचौ हप्तामा प्रवेश गरेको फिल्मले चौथो सातासम्म लोभलाग्दो कमाई गर्यो । निर्माण कम्पनीका अनुसार, फिल्मले चार सातामा ४६ करोडको आँकडा पार गरेको छ । बिहिबार, शुक्रबार र शनिबार पनि फिल्मको अकुपेन्सी सुखद छ ।

यो फिल्मले ५० करोडको लाइभ टाइम कलेक्शन पार गर्ने अनुमान गरिएको छ । यसका लागि फिल्म अझै केही साता हलमा चल्न आवश्यक छ । तर, बिहिबारबाट रिलिजमा आउन लागेको दक्षिण भारतीय फिल्म ‘पुष्पा २’ यो फिल्मको लोभलाग्दो कमाइमा वाधक बन्न सक्छ ।

किनकी, यो फिल्म हलमा लागेसँगै प्रायजसो शोज यही फिल्मले लैजाने पक्का छ । यस्तो अवस्थामा, ‘पुर्ण बहादुरको सारङ्गी’ सिमित शोजमा खुम्चिन सक्छ । जसलेगर्दा, यसको ५० करोडको आँकडामा केही बाधा सिर्जना हुन सक्ने देखिन्छ ।

तर, ‘पुष्पा २’को समीक्षा गतिलो नआएको खण्डमा भने नेपाली फिल्मलाई फाइदा मिल्न सक्छ । जसको फाइदा ‘पुर्ण बहादुरको सारङ्गी’ले उठाउन सक्छ । सरोज पौडेलको लेखन तथा निर्देशनमा तयार भएको यो फिल्ममा विजय बराल, मुकुन भुषाल, प्रकाश सपुत, अन्जना बराइलीको अभिनय छ । फिल्मले ओभरसिजबाट २३ करोड माथिको कलेक्शन गरेको निर्माणपक्षले बताएको छ । विनोद पौडेल र प्याट्रिक सुवेदी फिल्मका निर्माता हुन् ।