फिल्म ‘क्याप्टेन’ निर्माण गरेपछि नायक तथा निर्देशक भुवन केसीले नयाँ फिल्म होम प्रोडक्सनमा बनाएका छैनन् । यसपछि, उनले केही बाहिरी ब्यानरका फिल्ममा काम पनि गरे । तर, उनले बनाउने भनिएका कुनै पनि फिल्म बनेनन् ।
‘एन्टी हिरो, पारस, माइतीघर’ लगायतका फिल्म बनाउन नसकेका भुवन अब भने नयाँ फिल्म निर्देशनको तयारीमा छन् । भुवनका अनुसार, उनको होम प्रोडक्सनबाट अब नयाँ फिल्म ‘करोडपति’ बन्नेछ ।
यो फिल्मको हाल धमाधम कथा लेख्ने काम भइरहेको छ । फिल्मको छायांकन उनका छोरा नायक अनमोल केसीले फिल्म ‘जेरीः अन टप’को छायांकन सकाएपछि हुनेछ ।
फिल्मको निर्देशन पनि भुवन आफैले गर्ने तयारी गरेका छन् । फिल्म ‘ड्रिम्स’ निर्देशन गरेपछि भुवनले नयाँ फिल्म निर्देशन गरेका छैनन् ।
‘करोडपति’ भुवनको होम प्रोडक्सनमा बनेको सुपरहिट फिल्म हो । अब, सोही नाम सापटी लिएर भुवनले नयाँ फिल्म निर्देशन गर्न लागेका हुन् । फिल्ममा अनमोल केसीले काम गर्ने पक्का भइसकेको छ । अन्य, कलाकारहरु छनोट नभएको भुवनले बताए ।
प्रतिक्रिया