फागुन २ मा ‘जेरीः अन टप’ नआउने, विपनाको ठाउँमा उषा

फिल्म ‘जेरीः अन टप’ फागुनको २ गते रिलिज नहुने भएको छ । यो फिल्मको हाल काठमाडौंमा छायांकन भइरहेको छ । फिल्मको छायांकनका क्रममा भेटिएका निर्माता सरोज न्यौपानेले फागुनको २ गते फिल्म रिलिज गर्न नसकिने जानकारी दिए ।

फिल्मको छायांकन काठमाडौंपछि लद्दाकमा गरिनेछ । यसैले, पनि फिल्मको छायांकन र पोष्ट प्रोडक्सनमा नै समय लाग्ने भएपछि यसको प्रदर्शन मिति पछि सारिएको हो । नयाँ प्रदर्शन मिति वितरकसँग छलफल गरेर तोकिने निर्माता न्यौपानेले जानकारी दिए ।

यो फिल्मलाई सुयोग गुरुङले निर्देशन गरिरहेका छन् । फिल्ममा अनमोल केसी, जसिता गुरुङ, केदार घिमिरे, आँचल शर्मा, भुवन केसी, उषा खड्गी लगायतका कलाकारहरुको अभिनय छ ।

फिल्ममा सुरुवातमा नायक अनमोल केसीको आमाको भूमिकामा विपना थापाले काम गर्ने पक्का भएको थियो । तर, विपनाको सेड्यूल नमिलेपछि उषाले अनमोलकी आमाको भूमिकामा काम गरिरहेकी छिन् । निर्माणपक्षका अनुसार, अर्को वर्षको जेठ महिनामा फिल्म रिलिज गर्ने सम्भावना छ ।