आमा समूहले निजी खर्चमा गर्भवती पोषण नाङ्लो कार्यक्रम सुरु

काठमाडौँ- आमा बन्न कहाँ सजिलो छ र? गर्भवती हुनु भन्दा अगाडि र भइसकेपछि पनि गर्भवती महिलालाई उत्तिकै पोषणयुक्त खानेकुराको आवश्यक पर्छ । कति गर्भवती महिला खान नपाएका कारणले ज्यान गुमाएका छन् । यसै सिलसिलामा रामेछापको खाँडादेवी गाउँपालिका ३ का स्वास्थ्य आमा समूहहरूले निजी खर्चमा गर्भवती पोषण नाङ्लो कार्यक्रम सुरु गरेका छन् । यो वडामा रहेका विभिन्न समूहले गर्भवती महिलालाई लक्षित गरी यो कार्यक्रम सुरु गरेको छ । गर्भवती महिलाको पोषण सुरक्षाका लागि यो कार्यक्रम सुरु गरिएको बतायको छ ।

स्थानीय ईश्वर स्वास्थ्य आमा समूह सुनुवार खोकले, लालुपाते स्वास्थ्य आमा समूह कुतुर्षा, देवी स्वास्थ्य आमा समूह कम्राती, जनज्योति स्वास्थ्य आमा समूह सित्खाटार, जनचेतना स्वास्थ्य आमा समूह, जनसेवा स्वास्थ्य आमा समूह सित्खा र बगैंचा सेतीदेवी स्वास्थ्य आमा समूहलगायतले यस्तो कार्यक्रम सञ्चालन गरिरहेको भिरपानी स्वास्थ्य चौकी आँपचौरका स्वास्थ्यकर्मी नारायणकृष्ण श्रेष्ठले जानकारी दिए ।

हालसम्म यी समूहले २४ जनाभन्दा बढीलाई पोषण सामग्री हस्तान्तरण गरिसकेका छन् र्। हरेक बार खाना चार’ भन्ने मूल नाराका साथ सुत्केरी तथा गर्भवती महिलालाई उक्त कार्यक्रममार्फत निजी खर्चमा पोषण समग्री हस्तान्तरण गर्दै आएको ईश्वर स्वास्थ्य आमा समूहकी सचिव एवंं महिला स्वास्थ्य स्वयम्सेविका तेजकुमारी सुनुवारले जानकारी दिएकि छिन् । यो अभियान निरन्तर चलाउने योजना रहेको उनले बताइन् ।