‘जेरी अन टप’ निर्माताको ‘फन फनी घुमेर’ पनि दशैंमा

आउँदो बर्षको दशैंमा फिल्म रिलिजको लाइनअप लामो देखिएको छ । एकपछि अर्का निर्माताले फिल्म रिलिजको लागि दशैंलाई नै मिति बुक गरिरहेका छन् ।

यो मितिमा ‘माइतीघर, परालको आगो, महाराजधिराज’ लगायतका फिल्म रिलिज गर्ने पक्का गरिएको छ । यस्तै, यो मितिमा अशोक शर्माको अनटाइटल प्रोजेक्ट, विराज भट्टको १२ गाउँ २ लगायतका फिल्म पनि रिलिज गर्ने तयारी गरिएको छ ।

अब, यो मितिमा नयाँ फिल्म थपिएको छ ‘फन फनी घुमेर’ । यो फिल्मलाई ‘जेरी अन टप’का निर्माता सरोज न्यौपानेले निर्माण गर्ने पक्का भएको छ । फिल्ममा सरोज र भविष्य खड्काको लगानी रहनेछ । फिल्मका लागि कलाकार, निर्देशक, प्राविधिक कोही पनि तय गरिएको छैन ।

सरोजले फिल्म ‘जेरी अन टप’ भने आउँदो बर्षको जेठ महिनामा रिलिज गर्ने घोषणा गरेका छन् । जेठको कुन दिनबाट फिल्म रिलिज हुन्छ भनिएको छैन ।