गतबर्ष दर्जन फिल्म रिलिजमा आएपछि नायक दयाहाङ राइले यो बर्ष कम फिल्ममा काम गर्ने बताएका थिए । केही फिल्म लगालग असफल भएपछि उनले कम फिल्ममा काम गर्ने र दर्शकलाई फरक स्वाद दिने बताएका थिए ।
तर, यो बर्ष दयाले काम गरिरहेका फिल्मको संख्या हेर्ने हो भने उनीसँग फुर्सद लिने समय नै छैन । उनका लागि निर्माताहरु समय कुरेर बसेका छन् । दयाले थुप्रै निर्मातालाई फिल्ममा काम गर्ने वचन दिएका छन् ।
मुख्यकुरा त, उनका नजिकका निर्देशकद्धय रामबाबु गुरुङ र उपेन्द्र सुब्बा ‘कबड्डी ५ र जारी २’ बनाउन कस्सिएका छन् । यी दुई फिल्मको काम सुरु हुने वित्तिकै दया यता लाग्नेछन् । उनी, हाल फिल्म ‘रिमै’को छायांकनमा व्यस्त छन् । तर, उनी व्यस्त भइरहँदा उनको छायांकन र रिलिजको सेड्यूल भने लामो बनिसकेको छ ।
दयाको हातमा अशोक शर्माको फिल्म छ । चैत्रदेखि यो फिल्मको छायांकन सुरु गर्ने बताइएको छ । फिल्म ‘दुखी आत्मा’को अझै २ वटा गीत खिच्नै बाँकी छ । दयाको समयको प्रतिक्षा निर्मातालाई छ ।
फिल्म ‘महाभोज’मा पनि उनले काम गर्नु नै छ । यो फिल्मको छायांकन पनि केही महिनामा सुरु गर्ने तयारी गरिएको छ ।
दयाको यो बर्ष ४ वटा फिल्म रिलिज भइसकेका छन् । अब, ‘कार्साङ, दुखी आत्मा, रिमै, राजागञ्ज’ लगायतका फिल्म पनि यसै बर्ष गर्ने तयारी निर्माताको छ । यस्तो अवस्थामा उनले यी फिल्मको प्रचारमा पनि साथ दिनुपर्नेछ ।
यसरीहेर्दा, दयाले कसरी आफ्नो सेड्यूल मिलाउँछन् हेर्न बाँकी छ । गतबर्ष पनि उनलाई यस्तै समस्या देखिएको थियो । यो बर्ष पनि उही समस्यामा दया दौडने देखिन्छ ।
प्रतिक्रिया