प्रदीपको काँधमा दिव्याको करिअर

माघको १६ गतेबाट रिलिजमा आउन लागेको फिल्म ‘एक्टर’बाट नायक दिलिप रायमाझीकी छोरी दिव्या रायमाझीले इन्ट्री गर्दैछिन् । उसो त यो फिल्ममा काम गर्ने भएपछि नै दिव्याको चर्चा फिल्म क्षेत्रमा छ । तर, दिव्याले अर्को फिल्म ‘पिताम्बर’मा पनि काम गरिसकेकी छिन् ।

रोचक कुरा के छ भने, यी दुबै फिल्ममा दिव्याको जोडीको रुपमा नायक प्रदिप खड्काले काम गरेका छन् । फिल्म ‘पिताम्बर’ नायिका आँचल शर्माले छाडेपछि दिव्याले इन्ट्री गरेकी थिइन् । कतिपयले यो फिल्ममा दिव्यालाई प्रदीपले नै इन्ट्री गरेको चर्चा समेत गर्ने गरेका छन् ।

शनिबार काठमाडौंमा आयोजित एक कार्यक्रममा दिव्या र प्रदीप एकसाथ स्टेजमा देखिए । लेदर्सको पहिरनमा दिव्या बोल्ड देखिइन् भने प्रदीप ह्यान्डसम देखिएका थिए ।

फिल्मको प्रचारमा पनि दिव्या र प्रदीपको बोन्डिङ गज्जबको देखिएको छ । उसो त फिल्म बजारमा यी दुई प्रेम सम्बन्धमा रहेको चर्चा समेत हुने गरेको छ । तर, यसको स्वतन्त्र पुष्टि भइसकेको छैन ।

एउटा कुरा पक्का के हो भने, दिव्याको सुरुवाती करिअरलाई अगाडि बढाउनमा प्रदीपको महत्वपूर्ण हात रहने देखिएको छ । प्रदीपको काँधमा दिव्याको करिअर छ भन्दा फरक नपार्ला ।