सिरियामा एक लाख बढी सरकार विरोधीहरु गाडिएको सामुहिक चिहान भेटिएको दाबी

काठमाडौं– विद्रोही समुहले राजधानी कब्जा गरेपछि सिरिया छाडेर भागेका तत्कालिन राष्ट्रपति बसर अल असद नेतृत्वको सरकारले मारेका एक लाखभन्दा बढी मानिसको चिहान भेटिएको दाबि गरिएको छ ।

अमेरिकामा बसेर सिरियाबारे वकालत गर्ने समूहको प्रमुखले सिरियाको राजधानी नजिक सामूहिक चिहान रहेको बताएका हुन् । सिरियाली टास्क फोर्सका प्रमुख मौआज मुस्ताफाका अनुसार राजधानी दमास्कसबाट ४० किलोमिटर टाढा अल कुतेइफामा भेटिएको सामूहिक चिहानमा एक लाख मानिसहरूको शव रहेको छ ।

असद सरकारविरूद्ध बोल्दा यातना दिएर मारिएका मानिसहरुको शव त्यस चिहानमा रहेको बताइएको छ । उक्त चिहान यही वर्ष भेटिएको पाँच चिहानमध्ये एक रहेको पनि मुस्ताफाले रोयटर्ससँग बताएका छन्।

उनले अन्यत्र पनि त्यस्ता सामूहिक चिहान हुनसक्ने र ती चिहानहरूमा अमेरिकी र बेलायती नागरिकहरू समेतलाई मारेर गाडिएको हुनसक्ने बताएका छन्।

असद सरकारले आफ्नो विरोध गर्नेलाई यातना दिएर मार्ने र सैनिक अस्पताल हुँदै सामूहिक चिहानमा लगेर गाड्ने गरेको मुस्ताफाले बताएका छन्। शव व्यवस्थापनका लागि दमास्कसका नगरपालिकाहरूले समेत सहयोग गरेको उनको आरोप छ । सामूहिक चिहानमा कार्यरत मानिसहरू, बुलडोजरका चालकहरूसँग कुरा गर्दा उनीहरूले शव व्यवस्थापनका लागि आफूहरूलाई बाध्य पार्ने गरेको बताएको उनले रोयटर्ससँगको अन्तर्वातामा बताएका छन् ।

उनले त्यस्ता चिहानहरू असुरक्षित रहेको पनि बताएका छन् । ती चिहान र त्यसमा गाडिएका मानिहरूबारे अनुसन्धानका लागि त्यसलाई सुरक्षित राख्नुपर्ने उनले बताएका छन् । सिरियामा गृहयुद्ध चर्किएयता असद नेतृत्वको सरकारले लाखौं मानिसहरूलाई यातना दिएर मारेको आरोप छ।