के विजय बरालको पारिश्रमिक ४० लाख पुगेको हो ?

फिल्म ‘पुर्ण बहादुरको सारङ्गी’ रिलिजमा आएपछि कलाकार विजय बरालको चर्चा चुलिएको छ । यो फिल्मको मुख्य भूमिकामा देखिएका विजयलाई लिएर अहिले फिल्म निर्माण गर्न अरु निर्माता पनि अग्रसर छन् । उनलाई फिल्मको अफर पनि राम्रै आइरहेको वुझिएको छ ।

तर, योसँगै विजयको पारिश्रमिकको चर्चा पनि चुलिएको छ । विजयले बजारमा २० लाख पारिश्रमिक डिमाण्ड गर्न थालेको चर्चा छ । कतिपयले त ३०–४० लाख माग्न थालेको चर्चा समेत गर्न थालेका छन् ।

तर, विजयले यी सबै कुराहरुलाई अस्विकार गरेका छन् । उनले भने–‘फिल्म चल्यो, अब विजयलाई यति दिनुपर्छ भन्ने होला । तर, मलाई अहिलेसम्म यती पारिश्रमिक भनेर अफर आएको छैन । जुन फिल्मको अफर आएको कुरा छ, ती फिल्मको स्क्रिप्ट मैले पढ्न पाएको छैन ।’

कलाकार बरालले आफूलाई अब फिल्मको अफर नै नआएपनि मतलब नहुने तर्क गरे । उनले भने–‘मलाई फिल्मको अफर नै नआएपनि मतलब छैन । सर्वाधिक ग्रस गरेको ऐतिहासिक फिल्ममा काम गरिहालेको छु । फिल्मको अफर नै आएन भने पनि केही छैन ।’

विजयले पारिश्रमिक धेरै लिन भन्दा पनि ठिक्क लिएर काम गर्नुपर्ने तर्क गरेका छन् । विजयले यसो भन्दै गर्दा उनले फिल्मी बजारमा २० लाख पारिश्रमिक माग गर्न थालेको चर्चा भने खुबै छ ।