सर्लाहीको बलरा–४ का पूर्ववडाध्यक्ष झाको मृत्यु

काठमाडौँ- सर्लाहीको बलरा नगरपालिका–४ का पूर्ववडाध्यक्ष केशव झाको निधन भएको हो । एक सातादेखि निमोनिया र श्वासप्रश्वाससम्बन्धी रोगबाट ग्रसित उनको ८५ वर्षको उमेरमा आज निधन भएको छ।

भतिजा नरेश झाका अनुसार उनी पञ्चायतकालदेखि राजनीतिमा सक्रिय थिए । विसं २०५६ मा बलरा गाविस अध्यक्ष पदमा निर्वाचित भएका उनी विसं २०७४ को स्थानीय तहको निर्वाचनमा कांग्रेसको तर्फबाट बलरा नगरपालिका–४ को वडाध्यक्ष पदमा निर्वाचित भएका थिए भने उनको एक छोरा र चार छोरी छन् ।

झाको निधनप्रति गहिरो दुःख व्यक्त गर्दै बलरा–४ मा आज शोक बिदा दिएको वडाध्यक्ष मणिभूषण सिंहले बताए ।