‘पिताम्बर’ चैत्र २९ बाट रिलिजमा आउने, यस्तो छ फस्टलुक

कृषा चौलागाइको निर्देशनमा तयार भएको फिल्म ‘पिताम्बर’को फस्टलुक सार्वजनिक गर्दै प्रदर्शन मिति तय गरिएको छ । यो फिल्म नयाँ बर्षको छेको पारेर चैत्र २९ गतेबाट रिलिजमा आउने भएको छ ।

सार्वजनिक फिल्मको फस्टलुकमा कलाकारहरु दयाहाङ राई, सौगात मल्ल र प्रदीप खड्कालाई देख्न सकिन्छ । यो पोष्टर आकर्षक छ । जसले फिल्मप्रति दर्शकको चाहना र कौतुहलता बढाउने निश्चित छ ।

पोष्टरमा प्रदीपको एङ्ग्री अवतार अझै विशेष छ । ७० दिनमा छायांकन सकिएको फिल्मलाई निर्देशक चौलागाइले आफ्नो ड्रिम प्रोजेक्ट बताउँदै आएकी छिन् । फिल्ममा दिव्या रायमाझी, अनुप विक्रम शाही, सुरक्षा पन्त, प्रमोद अग्रहरि, दिव्यदेव, सुपुष्पा भट्ट, कामेश्वर चौरासिया, गौरव बिष्ट, विशाल पहारी लगायतका कलाकारहरुको अभिनय छ ।

केपी फिल्मस्ले पुरुषोत्तम प्रधान फिल्मसँग सहकार्य गर्दै यो फिल्म निर्माण गरेको हो । पुरुषोत्तम प्रधानको डीओपी रहेको फिल्ममा विशाल चौलागाइको लगानी छ । फिल्ममा प्रदीप भारद्धाजको लेखन, हिमाल केसीको एक्सन छ । यो फिल्मलाई ५ करोड बजेटमा निर्माण गरिएको निर्माणपक्षले बताउँदै आएको छ ।