नयाँ बर्षको दिन फिल्मले राम्रो व्यापार गर्ने लोभका साथ निर्माताहरु आफ्नो फिल्मको प्रदर्शन मिति तोक्न हानथाप गरिरहेका छन् ।
चैत्र २९ गते शुक्रबार तीन फिल्म रिलिज हुने संभावना उच्च छ । जसमध्ये दुई फिल्मको प्रदर्शन मिति सार्वजनिक भइसकेको छ । छायांकन भइरहेको फिल्म ‘कर्मा’ र हालै छायांकन सकेर पोष्ट प्रोडक्सनमा रहेको फिल्म ‘पिताम्बर’ चैत्र २९ गते रिलिज हुने पक्का भइसकेको छ ।
यो मितिमा नायक राजेश हमालको कमब्याक फिल्म ‘नरसिंहाः अवतार’ पनि रिलिज हुने संभावना उच्च छ । यसको मेकरले यही मितिमा फिल्म रिलिज गर्ने तयारी गरिरहेको वुझिएको छ । उसो त यो मितिमा ‘बलिदान’ नामक फिल्म पनि रिलिज गर्ने तयारीमा निर्देशक सन्तोष सेन रहेको वुझिएको छ । तर, यो फिल्मको काम नसकिने संभावना पनि उच्च रहेको वुझिएको छ ।
रोचक कुरा के छ भने, यो मितिमा रिलिज हुन लागेका सबै फिल्म एक्सनप्रधान हुन् । एउटै मितिमा फरक फरक जनराका फिल्म रिलिज भएको खण्डमा सुखद हुन्छ । तर, एउटै प्रकृतीका फिल्म रिलिज गर्दा निर्मातालाई घाटा लाग्ने संभावना देखिन्छ । तर, एक्सन जनराका तीन फिल्म रिलिज हुने संभावना प्रबल देखिन्छ ।
यसो भन्दै गर्दा, चैत्र २२ गते फिल्म ‘बसन्त’ रिलिजमा आउँदैछ । यो फिल्मलाई प्रकाश सपुतले निर्देशन गरेका हुन् । फिल्ममा प्रकाश र स्वस्तिमा खड्का मुख्य भूमिकामा छन् । यो फिल्मले बक्स अफिसमा नसोचेको व्यापार गर्न सक्छ ।
यसैले, यो फिल्मले चैत्र २९ गते पनि राम्रै हल कब्जा गर्ने संभावना बढी छ । यस्तो भएको खण्डमा चैत्र २९ गतेबाट रिलिजमा आउन लागेका मल्टिस्टारर एक्सन फिल्महरुलाई केही गाह्रो पर्न सक्छ । यो बिषयमा पनि सोचविचार गरेर निर्माताले फिल्मको मिति तोक्न आवश्यक छ ।
प्रतिक्रिया