नायक पल शाह म्युजिक भिडियोमा अभिनय मात्र होइन, निर्माणमा पनि सक्रिय देखिएका छन् । म्युजिक भिडियोमा आफै लगानी गरेर उनले तयार पारेको ‘मायालाई पानको पात’ बोलको गीत अहिले चर्चामा छ । यो गीतको भिडियोलाई युट्युबमा १८ लाख बढीले हेरिसकेका छन् भने टिकटकमा पनि यो गीतको क्रेज उच्च देखिएको छ ।
पल आफै पनि यो गीतको प्रमोशनमा लागिपरेका छन् । सामाजिक संजालदेखि मेला महोत्सवमा उनी यही गीतमा नाचिरहेका छन् ।
अडियो र भिडियोमा आफै लगानी गर्दै पलले संगीत क्षेत्रमा आफूलाई अगाडि बढाएका हुन् । नेपाली भिडियोको बजार सुक्दै गएको अवस्थामा पल यसलाई जोगाउन अगाडि सरेका छन् । जसले, नेपाली गीतसंगीतलाई फेरि दर्शकमाझ अगाडि ल्याउने अपेक्षा गर्न सकिन्छ ।
उसो त, पलको माग अहिले म्युजिक भिडियो र महोत्सवमा खुबै देखिन्छ । मेला महोत्सव र भिडियोमा सक्रिय बनाएका पलको हातमा ३ फिल्म छन् । ती फिल्मको छायांकन कहिलेबाट सुरु हुन्छ पक्का छैन ।
पल भने आफै कम्पनी स्थापित गर्दै गीतसंगीत र भिडियो निर्माण गरिरहेका छन् । राम्रो अडियो र राम्रो भिडियो बनाउन सकेको खण्डमा दर्शकले मन पराउँछन् भन्ने पुष्टि भएको पलको तर्क छ ।
प्रतिक्रिया