४९ दिनमा सकियो ‘होस्टेल ३’को छायांकन, फेरि जन्मिएलान् स्टार ?

फिल्म ‘होस्टेल ३’को प्रमुख छायांकन ४९ दिनमा सकिएको यसको निर्माणपक्षले बताएको छ । तर, केही कलाकारहरुको शारीरिक परिवर्तन आवश्यक रहेकाले एक साताको फुटकर छायांकन भने बाँकी रहेको निर्देशक सशान कँडेलले जानकारी दिएका छन् । यो फिल्मको हाल पोष्ट प्रोडक्सन चलिरहेको छ ।

यो फिल्मको प्रदर्शन मितिको भने टुंगो लागेको छैन । यसअघि फागुनको १६ गतेबाट रिलिज गर्ने भनिएतापनि निर्माणपक्षले मिति पोष्टपोन्ड गरिसकेको छ ।

यो फिल्ममा पारस बम, रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी, उमर खान, समा पराजुली, सन्तोष बानियाँ, रोहन श्रेष्ठ, आशिष पुरुष लगायतका कलाकारहरुको अभिनय छ । यो फिल्मको कथा माधव शर्माले लेखेका हुन् ।

सम्मान इन्टरटेन्मेन्टले आरोन कन फिल्मसँग सहकार्य गर्दै निर्माण गरेको फिल्ममा अर्जुन तिवारीको डीओपी, वुद्द थापा र मनोज खत्रीको छायांकन छ । फिल्ममा शंकर कोइराला कार्यकारी निर्माता, कर्ण कार्की र गोविन्द अधिकारी निर्माता र सुरेश कँडेल सह–निर्माताको रुपमा छन् ।

‘होस्टेल’का दुई सिरिजले नेपाली फिल्म क्षेत्रमा सुपरस्टारहरुको जन्म गराएको छ । अनमोल केसी, सलोन बस्नेत, नाजिर हुसेन, सुशिल श्रेष्ठ, स्वस्तिमा खड्का जस्ता स्टारहरु यही सिरिजबाट जन्मिएका हुन् । ‘होस्टेल ३’बाट पनि कलाकारहरु फिल्म क्षेत्रमा उदाउने अपेक्षा गरिएको छ ।