काम नगरेको भनेर सँधै गाली गरेपछि सासुको हत्या

काठमाडौं– काभ्रेमा ज्वाईँले सासुको हत्या गरेका छन् । मण्डनदेउपुर नगरपालिका–१ गैरीगाउँ घिसिङ टोलकी ५२ वर्षीया तिनमाया तामाङको आफ्नै ज्वाईँले हत्या गरेका हुन् ।

सासुको हत्याको आरोपमा मृतकका ज्वाइँ २८ वर्षीय सुकबहादुर तामाङलाई प्रहरीले नियन्त्रणमा लिएको छ । प्रहरीको प्रारम्भिक अनुसन्धानबाट तिनमायाको हत्या सुकबहादुरले नै गरेको खुलेको प्रहरीको दाबी छ ।

तिनमाया तामाङ मंसिर ३० गते आफ्नै घरभित्र मझेरीमा मृत अवस्थामा फेला परेकी थिइन् । सुकबहादुरले नै हत्या गरेको खुलेपछि पुस ५ मा उनलाई पक्राउ गरिएको थियो ।

तिनमायाले काम नगर्ने भनेर सँधै आफूलाई गाली मात्र गर्ने गरेको सुकबहालुरले बताएका छन् । उनको हत्या गरेको दिनपनि आफूलाई गर्न थालेपछि हत्या गरेको सुकबहादुरले स्वीकार गरेको प्रहरीको दाबी छ ।

उनले तिनमायालाई मुक्का प्रहार गरेका थिए । साथै उनले तिनमायाको टाउको थाममा ठोक्काएर हत्या गरेको बयान दिएका छन् । उनलाई जिल्ला अदालतमा पेस गरी पाँच दिन म्याद थप गरेर अनुसन्धान गरिरहेको जिल्ला प्रहरी कार्यालयले जनाएको छ ।