अब त हिरोइन बन्लिन् कि मिस पबी ?

टिकटक हुँदै म्युजिक भिडियोमा रमाएकी मिस पबी अहिले कमेडी गरिरहेकी छिन् । ‘कमेडी दरबार’मा उनले कमेडी गरेपनि दर्शकले उनलाई खासै पत्याएका छैनन् ।

‘मिस पबी’ फिल्ममा पनि इन्ट्री गर्न खोजिरहेकी छिन् । उनले फिल्म ‘रानीमहल’मा काम गर्ने पक्का भएको थियो । फिल्ममा आँचल शर्मा, सलोन बस्नेत लगायतका कलाकारहरुको अभिनय रहने पक्का भएको थियो । तर, पाँच तारेमा घोषणा गरिएको यो फिल्म नै बनेन । यसपछि, मिस पबीको नायिका बन्ने सपनामा पनि धक्का लाग्यो ।

उनै, पबीले अब नयाँ फिल्म ‘माग्ने राजा’ साइन गरेकी छिन् । उसो त, यो फिल्ममा उनी मुख्य नायिका होइनन् । फिल्ममा कलाकार केदार घिमिरे शिर्ष भूमिकामा देखिदैछन् भने वर्षा सिवाकोटी उनको जोडीको रुपमा देखिदैछिन् ।

तर, निर्देशक ऋषि लामिछाने र निर्माता मुनाल घिमिरेले मिस पबीलाई पनि फिल्ममा भित्राएका छन् । फिल्ममा भित्रिन पाउँदा मिस पबी पनि खुशी देखिएकी छिन् ।

पहिलो फिल्म घोषणा भएर पनि बनेन, मिस पबीले काम गर्न लागेको दोस्रो फिल्म भने बनोस्, शुभकामना ।