अनमोलको अलमल करिअर

दश बर्ष अगाडि नेपाली फिल्म क्षेत्रमा प्रवेश गरेका नायक अनमोल केसी चर्चामा छन् । उनको चर्चा विशेषगरि, अभिनय भन्दा पनि लुक्सका कारण हुने गर्दछ । बक्स अफिसमा अनमोलका फिल्म चलेपनि नचलेपनि उनी भने सर्वाधिक महंगा र डिमाण्डेड नायक बनिरहेका छन् ।

तर, दश बर्षमा आइपुग्दा अनमोलको करिअर भने अलमलमा देखिएको छ । उनी अभिनित नयाँ फिल्म ‘जेरीः अन टप’ कहिलेबाट रिलिजमा आउँछ टुंगो छैन । यो बर्ष नै रिलिजमा आएको फिल्म ‘फर्की फर्की’को अवस्था पनि नेपाली बक्स अफिसमा सुखद बन्न सकेन ।

यो बर्ष नेपाली फिल्मले ५० करोडसम्मको ग्रस कलेक्शन देखिसकेको छ । नयाँ नायक समीर भट्टकै फिल्म २० करोड कमाउन सफल भयो । यस्तो अवस्थामा अनमोलमाथि चुनौतीको पहाड छ ।

अनमोलले ‘जेरीः अन टप’पछि कुन फिल्ममा काम गर्छन् पक्का छैन । उनी, एउटा फिल्म नसकी अर्को फिल्म साइन नगर्ने नायकमा पर्छन् । अब, अनमोलका फिल्मले ५–६ करोड ग्रस गरेर मात्र सुख छैन । उनले बक्स अफिसमा एउटा ठूलो उछाल ल्याउन आवश्यक छ । यसका लागि उनले फिल्म छनोटमा पनि विशेष ध्यान दिनुपर्छ ।

तर, अहिलेसम्मको अवस्था हेर्दा अनमोलको करिअर अलमलमा परेको देखिन्छ ।