भक्तपुरमा स्कुटर दुर्घटनामा चालकको उपचारको क्रममा मृत्यु

भक्तपुर – मध्यपुर ठिमी नगरपालिका-२ सानोठिमीमा सोमबार स्कुटर दुर्घटनामा परी घाइते भएका चालकको उपचारका क्रममा मृत्यु भएको छ। जिल्ला प्रहरी परिसर भक्तपुरका डिएसपी ढुण्डिराज न्यौपानेका अनुसार, दुर्घटनामा परी गम्भीर घाइते भएका ३१ वर्षीय निश्चलप्रकाश राजभण्डारीको उपचारको क्रममा मृत्यु भएको हो।

सोमबार बा.प्र.०२-०२८ प ६६१० नम्बरको स्कुटर सानोठिमीबाट मगरगाउँ जाँदै गर्दा अनियन्त्रित भएर दुर्घटनामा परेको थियो। चालक निश्चलप्रकाश राजभण्डारी सानोठिमी धुन्चेपाखाका स्थायी बासिन्दा थिए। दुर्घटनामा गम्भीर घाइते भएका उनलाई उपचारका लागि भक्तपुर इन्टरनेशनल अस्पताल लगिएको थियो र थप उपचारको लागि नर्भिक अस्पताल लगिएको थियो। तर, बिहीबार साँझ उपचारको क्रममा उनको मृत्यु भएको बताइएको छ।

दुर्घटनामा राजभण्डारीकी श्रीमती २८ वर्षीया पुजा श्रेष्ठ पनि घाइते भएकी थिइन्। उनको उपचार नर्भिक अस्पतालमा भइरहेको छ।

यसै बीच, दुर्घटनामा संलग्न स्कुटरलाई प्रहरी प्रभाग सानोठिमीमा राखिएको छ र थप अनुसन्धान जारी रहेको छ।