प्रदीप र दिव्याको प्रेम चर्चा

नेपाली फिल्म क्षेत्रमा एकसाथ काम गरेपछि नायक–नायिकाविच प्रेमको चर्चा हुनु कुनै नौलो कुरा नै होइन । प्रेममा परेको चर्चा गरेर कतिपयले फिल्म हिट बनाउने अस्त्र समेत फ्याक्ने गर्छन् ।

नायक प्रदीप खड्का पनि प्रेमको चर्चामा सधै नै रंगिने गर्छन् । उनले काम गरेका अधिकांश फिल्मका नायिकाहरुसँग उनको नाम जोडिएको छ ।

अब, प्रदीपको नाम नायिका दिव्या रायमाझीसँग जोडिन थालेको छ । फिल्म ‘एक्टर’मा एकसाथ काम गरेपछि प्रदीप र दिव्याको नाम एकसाथ जोडिएको हो । यी दुइले फिल्म ‘पिताम्बर’मा पनि काम गरिसकेका छन् ।

फिल्म ‘पिताम्बर’मा सुरुवातमा नायिका आँचल शर्माले काम गर्ने पक्का भएको थियो । तर, समय दिन नभ्याएपछि आँचलले यो फिल्म छाडिन् । पछि, यो फिल्ममा दिव्याको प्रवेश भयो । नायक प्रदीप खड्काको कारणले नै दिव्या यो फिल्ममा प्रवेश गरेको धेरैको अनुमान छ ।

फिल्मको सेटमा पनि दिव्या र प्रदीपको प्रेम गज्जबले झल्किएको वुझिएको छ । यो बिषयमा दुइले केही पनि बोलेका छैनन् ।

तर, फिल्म ‘एक्टर’ रिलिजको मिति नजिकिदै जाँदा यी दुइको प्रेम चर्चा पनि सुरु भएको छ । यसले, कतै फिल्म प्रचारका लागि प्रेमको फन्डा मच्चाइएको त होइन भन्ने पनि अड्कल लगाउन सकिन्छ । यसको जवाफ अब दिव्या र प्रदीपले नै देलान् कि ?