‘एक्टर’को नयाँ गीतमा प्रदीपको प्रेम दिव्या र आनासँग

माघको १६ गतेबाट रिलिजमा आउन लागेको फिल्म ‘एक्टरः टेक १’को दोस्रो गीत सार्वजनिक गरिएको छ । ‘के भरोसा गरम’ बोलको गीतलाई सार्वजनिक गर्दै यसको निर्माणपक्षले प्रचारलाई आक्रामक रुपमा अगाडि बढाएको हो ।

यो गीतमा हुर्कलस बस्नेत र इन्दिरा जोशीको स्वर, उर्मिला गुरुङको शब्द र हुर्कलस बस्नेतको संगीत छ ।

सार्वजनिक गीतको भिडियोमा फिल्मका मुख्य कलाकारहरु प्रदीप खड्का, आना शर्मा र दिव्या रायमाझीलाई फिचरिङ गरिएको छ । गीतमा प्रदिपसँग दुई नायिकाको प्रेम देखाइएको छ । प्रदिपको फिल्ममा कुन नायिकासँग प्रेम छ भन्ने कौतुहलता यो गीतले जगाउँछ ।

राजन भुषालको निर्देशन रहेको यो फिल्ममा राजवल्लभ कोइराला पनि छन् । फिल्ममा आकाश बराल र राजन भुषालको कथा छ । फिल्ममा थमन कुमार भण्डारीको लगानी, मोती कार्कीको क्रियटिभ निर्माण, अनीश भुसाल सह–निर्माताको रुपमा छन् ।

फिल्मको गीतको भिडियोमा किरण थापाको कोरियोग्राफी, नरेन्द्र मैनालीको छायांकन, निमेष श्रेष्ठको सम्पादन छ । माघको १६ गतेबाट रिलिजमा आउन लागेको यो फिल्म दर्शकका लागि प्रतिक्षित छ ।