नेपालमा बन्ने गरेका हरर फिल्मले दर्शकलाई तर्साउन सकेका छैनन् । हलमा पुगेका अधिकांश दर्शक हरर फिल्म हेरेर हाँस्ने गरेका छन् । जसकाकारण, नेपालमा बनेका हरर फिल्मप्रति दर्शकको मोह पनि खासै देखिदैन ।
नेपालमा हरर फिल्ममा धेरै काम गर्ने नायिकामा पर्छिन् प्रियंका कार्की । तर, उनले काम गरेका हरर फिल्मको चर्चा खासै हुन्न । प्रियंकालाई पनि यो कुरा थाहा छ ।
प्रियंकाले आफू अहिले हरर फिल्मको अफर आउँदा सचेत हुने गरेको र टिमलाई सल्लाह दिने गरेको बताइन् । प्रियंकाले भनिन्–‘हरर फिल्ममा मेरो प्रतिष्ठा राम्रो छैन । यसैले, म आफै पनि बेला बेला सोचिरहेको हुन्छु । मैले फिल्मको अफर आउँदा नै टिमलाई भनेको हुन्छ । किनकी, हरर फिल्मको स्क्रिप्ट त राम्रो हुन्छ नै । तर, फिल्म बन्दासम्म निकै नै संझौता हुने गर्दछ ।’
प्रियंकाले अभिनय गरेको फिल्म ‘माला’ बक्स अफिसमा असफल भएपनि यसको चर्चा राम्रै भयो । यसपछि, उनले अभिनय गरेका अधिकांश हरर फिल्मले दर्शक तान्न सकेनन् ।
उनै, प्रियंका फिल्म ‘ममी’को प्रचारमा छिन् । फागुनको २५ गतेबाट रिलिजमा आउन लागेको यो फिल्मलाई लिएर उनी उत्साहित छिन् । प्रियंका यसपटक आफ्नो हरर फिल्मप्रतिको इमेज सुधार्ने प्रयासमा छिन् ।
प्रतिक्रिया