‘ममी’को पोस्टरमा प्रियंकाको डरलाग्दो गेटअप

समर निरौलाको निर्देशनमा तयार भएको फिल्म ‘ममी’को नयाँ पोस्टर सार्वजनिक गरिएको छ । सार्वजनिक नयाँ पोस्टरमा नायिका प्रियंका कार्कीलाई स्थान दिइएको छ ।

सार्वजनिक दोस्रो पोस्टरमा नायिका कार्कीको डर मिश्रित भाव देख्न सकिन्छ । उनको छेउमा कालो बिरालो उभिएको छ ।

पुरानो घरको अगाडि उभिएकी प्रियंका र उनको पछाडि रहेको घरको भित्तामा राखिएको फोटो फ्रेममा अभिनेता सुलक्षण भारती, बाल कलाकार आयुषी ढकाल र जेभिस श्रेष्ठको तस्वीर देख्न सकिन्छ । फोटो फ्रेममा काँच फुटेको पनि देख्न सकिन्छ ।

यो फिल्ममा दीया मास्के, सुलक्षण भारती, समीप निरौला, घनश्याम जोशी, आयुषी ढकाल, जेभिस श्रेष्ठ, गीत बिष्ट लगायतलाई पनि देख्न सकिन्छ । सो ट्वान्टी फाइभको प्रस्तुतिमा निर्माण भएको फिल्ममा समर निरौला र पूर्णिमा जोशीको लेखन छ ।

फिल्मका निर्माता लोकराज जोशी र पूर्णिमा जोशी हुन् । सुमन कोइराला फिल्मका कार्यकारी निर्माता छन् ।

निशाल पौडेल र शरद महत्तोले संयुक्त रुपमा छायांकन गरेको यो फिल्ममा सुरेन महर्जनको सम्पादन, दिपेश चौधरी र एसडी योगीको संगीत छ ।