नायक सलोन बस्नेतको प्रस्तुतिमा तयार भएको फिल्म ‘रंगी’मा समावेश ‘छ भने माया’ बोलको गीत सार्वजनिक भएको छ । काठमाडौंमा आज आयोजित पत्रकार सम्मेलनमा लोकलयमा आधारित यो गीत रिलिज गरिएको हो । यो फिल्म प्रेम दिवसको अवसर पारेर फागुनको २ गतेबाट रिलिजमा आउँदैछ ।
आनन्द कार्की र सुजता केसीको स्वर रहेको गीतमा दुर्गेश थापाको शब्द तथा संगीत छ ।
कविराज गहतराजले कोरियोग्राफी गरेको गीतको भिडियोलाई सौरभ लामाले खिचेका हुन् । यो गीतको भिडियोमा फिल्मका मुख्य कलाकारहरु सलोन बस्नेत, दीलिप रायमाझी, नम्रता श्रेष्ठ, आयुषी ढकाल, विशाल पहारी, उत्तम केसीको नृत्य हेर्न सकिन्छ ।
लोकलयमा तयार भएको यो गीतको अडियोले दर्शकको मन जित्ने अपेक्षा गर्न सकिन्छ । सुरेश न्यौपानेको डेब्यू निर्देशनमा तयार भएको फिल्ममा करिश्मा केसी बस्नेत, सक्षम सुवेदी र अनिष गौतमको लगानी छ ।
नायक सलोन बस्नेतको प्रस्तुतिमा तयार भएको फिल्मले बाबु र छोरीको कथा भन्छ । सुमन गजमेरको लेखन रहेको फिल्ममा कविराज र शिशिर खातीको कोरियोग्राफी, सौरभ र इश्वर सिन्केमानाको डीओपी छ ।
फिल्म ‘रंगी’ आफ्नो लागि विशेष भएको नायक तथा प्रस्तुतकर्ता सलोनको भनाई थियो । उनले भने–‘यो फिल्म मेरा लागि विशेष छ । किनकी, मेरो घरमा छोरीको जन्म भएपछि नै यो फिल्म पनि जन्मिएको हो । यसैले, मैले यो फिल्म आफ्नो करिअरको नयाँ सुरुवातको रुपमा हेरेको छ ।’
प्रतिक्रिया