‘मायाबी’मय पलको महोत्सव

नायक पल शाहलाई महोत्सवमा भ्याई नभ्याई छ । उनी हरेक दिनजसो महोत्सवमा नाचिरहेका हुन्छन् । उनले महोत्सवमा आफ्ना हिट गीतमा दर्शक झुमाइरहेका छन् ।

तर, विगत केही दिनदेखि भने पललाई महोत्सवमा ‘मायाबी’ लागेको छ । फागुनको १४ गतेबाट रिलिजमा आउन लागेको यो फिल्मको प्रचारमा पल कुदिरहेका छन् । उनले, बेनीमा आयोजना भएको महोत्सवमा फिल्मको ‘टल टल’ बोलको गीत रिलिज गरेका थिए । उनी बारा पुगेर फेरि यही गीतमा दर्शकसँग झुमेका छन् । यतिमात्र होइन, पलले दर्शकलाई फिल्मको बिषयमा प्रश्न सोधे र टिसर्ट समेत उपहार दिए ।

दर्शकहरु फिल्म हेर्नका लागि निकै आतुर रहेको पलको वुझाई छ । फिल्मप्रति दर्शकको बढ्दो उत्साहले आफू निकै खुशी भएको पलको भनाई छ ।

नायक शाहले ‘मायाबी’ एउटा विशुद्ध प्रेमकथा र मित्रताको कथामा बनेको फिल्म भन्दै दर्शकलाई हेर्न आग्रह गरेका थिए ।
फिल्मको दोस्रो गीत ‘टलटल’लाई दर्शकहरुले रुचाइरहेका छन् । यसैले, अहिले महोत्सवमा यो गीतको पनि माग बढेको पलको भनाई छ ।

दिवाकर भट्टराइको निर्देशनमा तयार भएको यो फिल्म फागुनको १४ गतेबाट रिलिजमा आउँदैछ । फिल्ममा पलको साथमा दीपिका प्रसाँई, सुशिल सिटौला, प्रशान्त ताम्राकार, करिश्मा श्रेष्ठ, नव–नायक समिम खान लगायतका कलाकारहरुको अभिनय छ ।

दर्शकले लामो समयदेखि एक विशुद्ध प्रेमकथामा बनेको फिल्म हेर्न नपाइरहेको समयमा ‘मायाबी’ रोजाइमा पर्ने विश्वास निर्माणपक्षको छ ।