पललाई महोत्सवमा हेर्न आएका दर्शक हलमा आए के हुन्छ ?

महोत्सवका कारण देश दौडाहामा रहेका नायक पल शाहलाई हेर्न हरेक शहरमा हजारौंको भिड उर्लिएको छ । विशेषगरि, देशका पश्चिम भेगका जनताले उनलाई असिमित प्रेम गरेका छन् । उनलाई हेर्नका लागि महोत्सवमा १ लाखसम्म जनता पुग्ने गरेको देखिएको छ ।

यसैले महोत्सवमा पलको क्रेजको सामाजिक संजालदेखि चोक चोकमा चर्चा हुने गर्दछ । पल पनि दैनिकजसो एउटा न एउटा महोत्सवमा सहभागी भइरहेका छन् ।

उनलाई महोत्सवमा सहभागी गराउनका लागि आयोजकको हानथाप छ । पललाई महंगो पारिश्रमिक तिरेर महोत्सवमा बोलाउनका लागि आयोजकको लाइन नै लागेको छ ।

पल यतिबेला महोत्सवमा पुगेर आफ्नो फिल्म ‘मायाबी’को पनि प्रचार गरिरहेका छन् । फागुन १४ गतेबाट रिलिजमा आउन लागेको यो फिल्मलाई लिएर दर्शकमा उत्साह दैनिक रुपमा थपिदै गएको छ ।

तर, महोत्सवमा पललाई हेर्न उर्लिएको भेल हलमा पनि आउला त ? धेरैले सोध्ने प्रश्न यही नै हो । यसपटक पललाई यो चुनौती छ । महोत्सवमा उनको जुन खालको क्रेज देखिएको छ त्यो क्रेज हलमा पनि देखियो भने पल शाहलाई छुन कसैले पनि सक्दैन ।

लभ स्टोरी कथामा बनेको फिल्मको गीतसंगीतमा पनि पलले महोत्सवमा नृत्य गरिरहेका छन् । फागुन १४ गते दर्शकको यो भेल हलमा आयो भने ‘मायाबी’ले आक्रामक व्यापार गर्ने निश्चित छ ।