फिल्म ‘एक्टरः टेक वान’को ट्रेलरले युट्युबमा आक्रामक भ्यूज पाएको छ । यो समाचार तयार पार्दासम्म फिल्मको ट्रेलरले युट्युबमा १८ लाख बढी भ्यूज पाएको छ । साथै, यो ट्रेलर युट्युब ट्रेन्डिङको पहिलो स्थानमा छ ।
२१ सय भन्दा बढी प्रतिक्रिया आएको ट्रेलरमा १६ हजार लाइक्स छ । सस्पेन्स थ्रीलर शैलीको यो ट्रेलरलाई दर्शकले रुचाएका छन् । युट्युबसहित अन्य थुप्रै सामाजिक संजालमा पनि यो ट्रेलरलाई हेर्ने दर्शक लाखौं छन् । ट्रेलरले उत्साहजनक प्रतिक्रिया पाएपछि निर्माणपक्ष खुशी छ । माघको १६ गते फिल्मले ओपनिङ सुखद गर्ने विश्वास गरिएको छ ।
राजन भुषालको निर्देशनमा तयार भएको यो फिल्म नायक प्रदिप खड्काका लागि पनि महत्वकांक्षी छ । यो फिल्ममा आना शर्मा, दिव्या रायमाझी, राजवल्लभ कोइराला, निश्चल बस्नेत लगायतका कलाकारहरुको पनि अभिनय छ ।
फिल्म ‘पुजार सार्की’पछि प्रदिपको नयाँ फिल्मको प्रतिक्षा गरिरहेका उनका फ्यानहरु उत्साहित छन् । आकाश बराल र राजन भुसालको स्क्रिप्ट रहेको यो फिल्ममा थमन कुमार भण्डारीको लगानी छ ।
मोती कार्की क्रियटिभ निर्माता रहेको फिल्ममा अनिश भुसाल सह–निर्माताको रुपमा छन् । नरेन्द्र मैनालीको छायांकन रहेको यो फिल्ममा निमेष श्रेष्ठको सम्पादन छ ।
हर्कुलस बस्नेत, रोहित शाक्य, एलिस कार्कीले संगीत दिएको यो फिल्ममा शिशिर खाती र किरण थापाको कोरियोग्राफी छ । अष्ट महर्जनको फिल्ममा एक्सन छ । मंसिरपछि नेपाली फिल्मको बजार सुनसान बनिरहेको समयमा यो फिल्मले बजार गर्माउने विश्वास गरिएको छ ।
प्रतिक्रिया