महोत्तरीमा युवकको हत्या, शव गहुँ खेतमा फेला

काठमाडौँ- महोत्तरीको सोनमा गाउँपालिका–२ निवासी २९ वर्षीय नरेन्द्र यादवको शव गहुँ खेतमा फेला परेको छ।

सम्सी गाउँपालिका–१ स्थित गहुँ खेतमा गम्छाले घाँटी थिचेर हत्या गरिएको अवस्थामा यादवको शव फेला परेको हो।
मृतक नरेन्द्र यादव, तत्कालीन सोनमा गाविसका पूर्वअध्यक्ष गोखुलप्रसाद यादवका छोरा हुन्।

जिल्ला प्रहरी कार्यालयका प्रहरी उपरीक्षक नकुल पोखरेलको नेतृत्वमा टोलीले घटनास्थलको सर्जमिन मुचुल्का गरेको छ।शवलाई पोस्टमार्टमका लागि प्रादेशिक अस्पताल जलेश्वर ल्याउने तयारी भइरहेको छ। घटनाबारे अनुसन्धान जारी रहेको र विस्तृत विवरण पछि सार्वजनिक गरिने प्रहरी उपरीक्षक पोखरेलले जानकारी दिए।