‘पिताम्बर’को टिजरको भ्यूज किन रोकियो ?

चैत्रको २९ गतेबाट रिलिजमा आउन लागेको फिल्म ‘पिताम्बर’को टिजरले सुरुवाती दिनमा आक्रामक भ्यूज पायो । ट्रेन्डिङको तीन नम्बरसम्म आएको यो टिजरको भ्यूज १६ लाखसम्म पुग्यो ।

तर, अहिले भ्यूज रोकिएको छ । १६ लाखमा टिजरको भ्यूज रोकिएपछि अधिकांशले विभिन्न खालको अड्कलबाजी चलाइरहेका छन् । कतिपयले सुरुवाती दिनमा भ्यूज किनिएको र पछि बुष्ट गर्न छाडेपछि भ्यूज रोकिएको तर्क पनि गरेका छन् ।

तर, फिल्मकी निर्देशक कृषा चौलागाइका अनुसार टिजरमा काटमार, हिंसा र रगतको दृश्य भएका कारण युट्युबमा समस्या आएको हो ।

कृषाले भनिन्–‘युट्युबका प्रतिनिधबाट हामीले अडियो सन्देश नै आएको छ । युट्युबको गाइडलाइन भन्दा बाहिरका दृश्य धेरै भएकाले यस्तो अवस्था आएको हो । हामीलाई त्यस्ता दृश्यहरु हटाउन आग्रह गरिएको छ । तर, त्यस्ता दृश्य हटाउँदा टिजरको औचित्य नै रहदैन ।’

फिल्मको टिजरले उत्साहजनक प्रतिक्रिया पाएको भन्दै कृषा दंग छिन् । यो फिल्ममा प्रदीप खड्का, सौगात मल्ल, दयाहाङ राई, दिव्य देव, प्रमोद अग्रहरि, अनुप विक्रम शाही, सुरक्षा पन्त, सुपुष्पा भट्ट, दिव्या रायमाझी, गौरव बिष्ट लगायतका कलाकारहरुको अभिनय छ ।

फिल्मको टिजरको समीक्षा पनि निकै राम्रो आइरहेको छ । तर, युट्युबमा भने विविध कारणले भ्यूज रोकिएको छ ।