‘ताण्डवम्’ टिजरः ‘भगवान् पनि मै हुँ, राक्षस पनि मै हुँ’

कलरिष्ट जुनिम गहतराजको निर्देशनमा तयार भएको फिल्म ‘ताण्डवम्’को टिजर सार्वजनिक गरिएको छ । ५७ सेकेण्ड लामो टिजरले फिल्मको मुख्य बिषयवस्तु के हो भन्ने देखाउन खोजेको छ । फिल्मका मुख्य कलाकार अंकित खड्काको संवादबाट सुरु भएको यो टिजरमा ‘भगवान पनि मै हुँ, राक्षस पनि मै हुँ’ भन्ने संवादले धेरै कुरा बताउन खोजेको छ ।

डार्क थिममा तयार पारिएको यो टिजरले फिल्मका सबै कलाकारहरुलाई स्थान दिएको छ । फागुनको ९ गतेबाट रिलिजमा आउन लागेको यो फिल्ममा अंकित खड्का, जुनिम गहतराज, पुस्कर गुरुङ, प्रेम सुब्बा, सरिना मगर, अनोज पाण्डे, कमल कार्की, गोपाल कटुवाल लगायतको अभिनय छ ।

एक नवविवाहित जोडी जसले आफ्नो पहिलो सन्तानको स्वागतको लागि तयारी गरिरहँदा उनीहरुको जीवनमा आइपर्ने एक अकल्पनिय घटनाको कथामा यो फिल्म बनेको छ । सिंहदेवी प्रोडक्सनले भिज्यूल आर्टस् स्टूडियोसँग सहकार्य गर्दै तयार पारेको यो फिल्ममा धनकुमारी गहतराज, सविना मगर र मनिष गौतमको लगानी छ ।

हरि लामाको छायांकन रहेको फिल्ममा सम्राट बस्नेतको एक्सन, सुशान्त गौतमको संगीत छ । फिल्मको कथा, पटकथा तथा संवाद अनिरुद्ध आत्रेय र हुसेनले लेखेका हुन् । फिल्मले बदलाको कथा भन्छ ।