फिल्म ‘माइतीघर’मा नायिका परिवर्तन गरिएको छ । यो फिल्मबाट डेब्यू गर्न लागेकी नायिका दिकिला शेर्पा बाहिरिएकी छिन् । अब, फिल्ममा नव–नायिका श्यामाश्री शेर्पाको प्रवेश भएको छ ।
विशेषगरि, निर्माता रोहित अधिकारीले फिल्म ‘माइतीघर’बाट नै दिकिलालाई डेब्यू गराउन चाहेका थिए । सोही अनुसार, उनले फिल्म पनि साइन गरेकी थिइन् । तर, यो फिल्म भन्दा अगाडि नै रिलिज हुने तय भएको फिल्म ‘कुस्ती’ पनि दिकिलाले साइन गरिन् ।
यसपछि, दिकिलासँग रोहित फायर भए । उनले, दिकिलाको ठाउँमा नयाँ नायिका श्यामाश्रीलाई इन्ट्री गराएका हुन् ।
मिलन तामाङको निर्देशनमा तयार हुन लागेको यो फिल्ममा केदार घिमिरे, प्रकाश सपुत, धिरज मगर र उपासना सिंह ठकुरी फाइनल भइसकेका छन् । अब, श्यामाश्रीको पनि फिल्ममा इन्ट्री भएपछि मुख्य लाइनअप पुरा भएको छ ।
यो फिल्मलाई आउँदो बर्षको दशैंको फूलपातिबाट रिलिज गर्ने तयारी निर्माणपक्षको छ ।
प्रतिक्रिया