फागुनको १४ गतेबाट रिलिजमा आउन लागेको फिल्म ‘फेरि रेशम फिलिली’को नयाँ दुई पोस्टर सार्वजनिक गरिएको छ । सार्वजनिक दुबै पोस्टर अर्थपूर्ण र विशेष छ । यसले पनि फिल्मको कथावस्तु के हो भन्ने सामान्य अड्कल लगाउन सकिन्छ ।
सार्वजनिक दुई पोस्टरमा फिल्मका मुख्य तीन कलाकारहरु विनय श्रेष्ठ, कामेश्वर चौरासिया र सुपुष्पा भट्टलाई देख्न सकिन्छ । सार्वजनिक पोस्टरमा विनय हातमा पासपोर्ट बोकेर उभिएका छन् । सुपुष्पाको गेटअपमा आक्रोश भेट्न सकिन्छ ।
उनको हातमा बन्दुक पनि छ । कामेश्वरले भने दुई हात जोडेर माफी मागिरहेको देख्न सकिन्छ । साथै, पोस्टरमा नेपालको धरहरा र अमेरिकाको स्ट्याचु अफ लिबर्टी पनि देख्न सकिन्छ । फिल्मको पोस्टर हेर्दा बैदेशिक रोजगारीमा जान लागेको एक यूवक र उसको जीवनमा आइपर्ने विभिन्न घटनालाई फिल्मले देखाउन खोजेको वुझ्न सकिन्छ ।
निरज महर्जनले निर्देशन गरेको यो फिल्ममा नीर शाह, प्रकाश घिमिरे, शिशिर वाङ्देल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, सजन थापा लगायतका कलाकारहरुको अभिनय छ ।
सुशन प्रजापतिको छायांकन रहेको फिल्ममा निर्देशक महर्जन र आकाश बरालको पटकथा, नरेश किङ्ग योगीको एकसन, कालिप्रसाद बाँस्कोटा, एसडी योगी, हर्क साउद, जयन जे वाइवा, दीपक शर्माको संगीत, सुरेन्द्र पौडेलको सम्पादन छ ।
सिनेमा आर्ट र वि मोसन पिक्चर्सको सहकार्यमा निर्माण भएको फिल्ममा रौनक विक्रम कँडेलको लगानी छ । सुरज बम ठकुरी कार्यकारी निर्माता रहेको फिल्ममा एनी थापा सह–निर्माताको रुपमा छिन् ।
प्रतिक्रिया