काठमाडौँ- बारपाक सुुलिकोट गाउँपालिकाले आफ्नो कार्यक्षेत्रका अनाथ बालबालिकालाई आवासीय सुविधा र निःशुल्क पठनपाठनको व्यवस्था गरेको छ। गाउँपालिका ६ स्थित बाह्रकोटमा मनास्लु छात्रावास सञ्चालनमा ल्याएर, अभिभावकविहीन बालबालिकालाई खाने, बस्ने र अध्ययन गर्ने सुविधाको व्यवस्था गरिएको छ।
गाउँपालिका अध्यक्ष विष्णुप्रसाद भट्टका अनुसार, चालु शैक्षिक सत्रदेखि पालिकाभित्र विद्यालय जान नपाएका बालबालिकालाई निःशुल्क शिक्षा र आवासीय सेवा प्रदान गर्ने काम सुरु गरिएको हो। वर्तमानमा छात्रावासमा १९ जना अनाथ बालबालिका अध्ययनरत छन्, जसमा नौ जना छात्रा र १० जना छात्र छन्।
गाउँपालिकाले चालु आर्थिक वर्षमा यस उद्देश्यका लागि रु १२ लाख विनियोजन गरेको छ र छात्रावासमा दुई महिला कार्यालय सहयोगी, सुरक्षाकर्मी र एक निरीक्षकको व्यवस्था पनि गरिएको छ। अनाथ बालबालिकाका लागि आवश्यक सामग्री, जस्तै लत्ताकपडा, किताबकापी, कलम आदि दाताहरूबाट सहयोग लिइरहेको अध्यक्ष भट्टले जानकारी दिए।
प्रतिक्रिया