काठमाडौँ- अख्तियार दुरुपयोग अनुसन्धान आयोगले कोशी अस्पताल विराटनगरमा रेडियोग्राफर पदमा कार्यरत जितेन चौधरीविरुद्ध शैक्षिक प्रमाणपत्रको नक्कली प्रमाणपत्र सम्बन्धी आरोपपत्र दायर गरेको छ। चौधरीको शैक्षिक प्रमाणपत्र नक्कली रहेको आरोपमा आज विशेष अदालतमा मुद्दा दर्ता गरिएको अख्तियारका प्रवक्ता नरहरि घिमिरेले जानकारी दिएका छन्।
अस्पतालको सिटी स्क्यान डिपार्टमेन्टमा कार्यरत चौधरीले भारतको राजीभ गान्धी युनिभर्सिटी अफ हेल्थ साइन्स कर्नाटकमाथिको बीएससी एमआईटी सर्टिफिकेटको झुटो शैक्षिक प्रमाणपत्र पेस गरेका थिए। उक्त प्रमाणपत्रको सम्बन्धमा अख्तियारमा उजुरी निवेदन परेको थियो, जसका आधारमा अनुसन्धानपछि चौधरीविरुद्ध मुद्दा दायर गरिएको हो।
अख्तियारले चौधरीलाई भ्रष्टाचार निवारण ऐन, २०५९ अन्तर्गत दफा १६ को उपदफा १ बमोजिम आरोपमा कारबाही गर्न माग गरेको छ। चौधरी २०७२ सालदेखि कोशी अस्पतालमा कार्यरत थिए।
प्रतिक्रिया