सत्ताबाट बाहिरिनुपरेको कारण माओवादीले होहल्ला गरेको हो, पहिला प्रचण्ड आफैं सुध्रिनुपर्छः चित्रबहादुर केसी

राष्ट्रिय जनमोर्चा पार्टीका अध्यक्ष चित्रबहादुर केसीले अरुलाई उपदेश दिनुभन्दा पहिला नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ आफैं सुध्रिनुपर्ने बताएका छन् । आज (बुधबार) नेपाली रेडियो नेटवर्कको नेपाली बहसमा पत्रकार ऋषि धमलासँग संवाद गर्दै उनले एमाले र कांग्रेसले गरेको भ्रष्टाचार नालायक र गलत हुने र प्रचण्ड आफू सत्तामा गएपछि गर्ने भ्रष्टाचार, लुटपाट सबै जायज हुने कुरा मान्न नसकिने बताएका हुन् । प्रचण्डले सिद्धान्त, नैतिकता, इमानदारिताका साथ सरकारको नेतृत्व गर्न नसकेको उनको टिप्पणी छ ।

‘त्यस्तो गलत एमालेसँग उनी दुई÷दुई चोटी किन बालकोट गए ? उनले पनि सिद्धान्त, नैतिकता, इमानदारिताअनुसार राज्य सत्तामा घुमिसकेका छैनन् । उनलाई पनि जुनसुकै मूल्य चुकाएर भएपनि, जोसित मिलेर भएपनि सत्ता चाहिन्छ । सत्तामा माओवादी चार पटक गयो त ? के–के गर्यो ? नेपाली जनताले देखेको, बुझेको, सुनेको छैनन् ?’ प्रश्न गर्दै उनले भने, ‘आफैं सुध्रिनु पर्यो नि । माओवादीले अहिले होहल्ला फिँजाएको त सत्ताबाट बाहिरिएको कारणले हो नि । सत्तामा गएको बेला गर्नुपर्थ्यो नि यस्ता काम कुरा त ।’