काठमाडौं – बलिउडमार्फत विश्वभर अभिनयमा छाप छोड्न सफल अभिनेत्री मनिषा कोइरालाले पुनः नेपाली चलचित्र खेल्ने इच्छा व्यक्त गरेकी छन् । ‘फेरि भेटौँला’ र ‘धर्मा’ चलचित्रमा अभिनय गरेपछि मनिषाले थप नेपाली चलचित्र अभिनय गरेकी छैनन् । सोही कारण अहिले उनी आफैंले रोल मागेकी हुन् ।
नेपाल चलचित्र तथा सांस्कृतिक प्रतिष्ठानको आयोजनामा काठमाडौँमा जारी ‘नेपाल अन्तरराष्ट्रिय चलचित्र महोत्सव (निफ) को आठौँ संस्करणमा आयोजित ‘सिनेमा संवाद’मा उनले आफू पुनः नेपाली चलचित्रमा काम गर्न इच्छुक भएको बताइन् । ‘म नेपाली चलचित्रमा काम गर्न इच्छुक छु, नेपाली लेखक तथा निर्देशकले नयाँ र भिन्न विषय लिएर मलाई प्रस्ताव गर्न सक्नुहुनेछ । पछिल्लो समय नेपाली चलचित्रको निर्माणमा आएको परिवर्तन र कलात्मक शैलीलाई मैले नियालेकी छु ।’
सुरुआती समयमै आफूले नेपाली चलचित्रकर्मीलाई आफ्नै कथा भन्न आग्रह गरेको स्मरण पनि गरिन् । विदेशी चलचित्रको नक्कल गरेर बनाइने नेपाली चलचित्रले कालान्तरमा रचनात्मक बन्न प्रेरित नगर्ने उनको बुझाइ छ । उनले अन्तरक्रियाको क्रममा पछिल्लो समय व्यावसायिक र कलात्मक दुवै किसिमका चलचित्रले पाइरहेको सफलताको चर्चा गरिन् ।
‘मैले सुरुआती समयमा भन्ने गरेको शैलीमा अहिले चलचित्र बनिरहेका छन् । म निकै खुसी छु, किनकि अहिले कलात्मक चलचित्रले हामीलाई अन्तर्राष्ट्रिय चलचित्र महोत्सवमा उभ्याउन सफल भएको छ भने व्यावसायिक चलचित्रले नयाँ किर्तिमान बनाइरहेको छ । यो एउटा चलचित्रकर्मीका लागि सुखद खबर हो’, मनिषाले भनिन् । केही समयअघि निर्देशक दिवाकर भट्टराईले आफ्नो नयाँ चलचित्र ‘नरसिंहा अवतार’ मा मनिषा कोइरालालाई ‘एप्रोच’ नगरेका भने होइनन् ।
निर्देशक सम्झना उप्रेती रौनियारमार्फत दिवाकरले मुम्बईमा रहेकी मनिषालाई प्रस्ताव गरेका थिए । तर त्यसबेला उनी वेवसिरिज ‘हीरामण्डी’ को प्रवद्र्धनमा लाग्नु परेकाले असमर्थ भएको बताएकी थिइन् । तर पछिल्लो समय नेपालमै बस्दै आएकी मनिषाले फेरि एकपटक नेपाली चलचित्रमा आफूले ‘कमब्याक’ गर्न चाहेको खुलस्त पारेकी छन् ।
मनिषाको मुख्य भूमिका रहेको भारतीय वेब सिरिज ‘हिरामण्डी’ले निकै चर्चा पायो । निर्देशक सञ्जयलीला भन्सालीले निर्देशन गरेकमो वेभसिरिज भारत र नेपालमा लोकप्रिय भयो । मनिषाले भन्सालीसँग चलचित्र ‘खामोसी’ मा काम गरेको २८ वर्षपछि दोस्रो सहकार्य गरेकी थिइन् ।
प्रतिक्रिया