एमएसएममा रिलिज हुने भयो वेब सिरिज ‘घर बट् इन अमेरिका’

एमएसएम एपमा अमेरिकामा निर्माण भएको वेब सिरिज ‘घर बट् इन अमेरिका’ सार्वजनिक हुने भएको छ । १२ भागमा खिचिएको यो वेब सिरिजलाई वैशाखको दोस्रो साताबाट प्रशारण गर्ने तयारी एपको छ ।

नेपाली ओटीटी प्लेटफर्ममा रिलिज हुन लागेको यो पहिलो वेब सिरिज हो । १२ भाग नै एकसाथ यो ओटीटीमा रिलिज हुनेछ । यो सिरिजलाई विमलेश अधिकारीले निर्देशन गरेका हुन् ।

अमेरिकामा नै तयार पारिएको वेब सिरिजमा अरुणिमा लम्साल, विमलेश अधिकारी, राधाबाबु लम्साल, खेम शर्मा, आशिष दाहाल र रोजिना थापाको अभिनय छ ।

यो सिरिजले अमेरिकामा बसोबास गर्दै आएका नेपाली समुदायको जीवनशैली, आपसी सम्बन्धलाई प्रस्तुत गरेको छ । ट्रेलर पनि केही दिनमा नै सार्वजनिक गर्ने तयारी गरिएको छ ।

विवेक चाम्लागाँइले लेखेको सिरिजमा रोशन घिमिरेको लगानी छ । सुमित्रा अधिकारी र कुमारी घिमिरे सह–निर्माता रहेको यो सिरिजमा विक्रान्त मात्र श्रेष्ठको छायांकन, मीत्र डी गुरुङको सम्पादन छ ।