नायक अनमोल केसी आजबाट ३१ वर्षमा प्रवेश गरेका छन् । अनमोलले आज जन्मदिनको योजना त्यस्तो नयाँ नभएको बताए । बिहानै मन्दिर पुगेर आएका केसीले साथीभाइसँग जन्मदिन मनाउने बताए ।
नेपाली फिल्म क्षेत्रमा ‘होस्टेल’बाट उदाएका नायक केसीले यसपछि पछाडि फर्किएर हेर्नु परेको छैन । केसीले यसपछि ११ वटा फिल्ममा काम गरे । जसमध्ये, अधिकांश बक्स अफिसमा सफल छन् । वर्षमा एउटा मात्र फिल्ममा अभिनय गर्ने नायक केसीको पछिल्लो रिलिज फिल्म ‘फर्की फर्की’ हो ।
उनले करिअरमा ‘होस्टेल, जेरी, ड्रिम्स, गाजलु, कृ, क्याप्टेन, ए मेरो हजुर ३, ए मेरो हजुर ४, छड्के २, फर्की फर्की, जेरीः अन टप’ लगायतका फिल्ममा अभिनय गरेका छन् ।
उनी, नेपाली फिल्म क्षेत्रमा सर्वाधिक धेरै पारिश्रमिक लिने नायकको रुपमा चिनिन्छन् । फिल्म ‘कृ’मा २० लाख पारिश्रमिक लिएपछि अनमोलको चर्चा चुलिएको थियो । यसपछि, उनको पारिश्रमिक ५० लाख पुगिसकेको छ ।
नायक भुवन केसी र नायिका सुस्मिता केसीको सन्तानको रुपमा जन्मिएका केसीले बालकलाकारको रुपमा फिल्म ‘साथी म तिम्रो’मा काम गरेका थिए । निरन्तर रुपमा नेपाली फिल्म क्षेत्रमा काम गरिरहेका केसीलाई ‘मेघास्टार’ उपनाम समेत दिइएको छ ।
नायक केसीको अभिनयमा भने सधै नै प्रश्न चिन्ह उठ्ने गरेको छ । उनको लुक्स, उनको शालिनता, उनको बोल्ने शैलीलाई सबैले मन पराउँछन् । तर, फिल्मी पर्दामा उनलाई अभिनय कमजोर गरेको आरोप आज पनि लाग्ने गरेको छ ।
नेपाली फिल्म क्षेत्रका युवा नायकलाई जन्मदिनको धेरै धेरै शुभकामना ।
प्रतिक्रिया