कतै भाग्दिन भन्दै फरार दुर्गा प्रसाईले भिडियोमार्फत दिए पक्राउ गर्न सरकारलाई चुनौती

काठमाडौं । राजसंस्था पुनःस्थापनाको आन्दोलनका कमान्डर तोकिएका दुर्गा प्रसाईले तीन दिनपछि भिडियोमार्फत आफूलाई पक्राउ गर्न र पूर्वराजा ज्ञानेन्द्र शाहलाई नजरबन्दमा राख्न सरकारलाई चुनौती दिएका छन् । शनिबार बिहान ललितपुरको इमाडोलमा रहेको विवादास्पद धर्मगुरु पुष्कर खतिवडाको निवासमा स्याउ र केरा खाएर मोबाइल स्विच अफ गरी सम्पर्कविहीन भएका प्रसाईले करिब ५० सेकेन्डको भिडियो सन्देश जारी गर्दै सरकारलाई पक्राउ गरेर देखाउन चुनौती दिएका हुन् ।

प्रसाईले आफूले ज्यान नमारेको र बलात्कार पनि नगरेको भन्दै भारतको नोयडामा लुकेर नबसेको भन्दै सरकार र दलका नेताहरूलाई भ्रष्ट र दलालको संज्ञा दिएका छन् । उनले आफूले भ्रष्ट नेताहरुको चंगुलबाट देशलाई बचाउन आन्दोलन गरेको भन्दै साथ र सहयोग गर्न आह्वान पनि गरेका छन् ।

भिडियोमा प्रसाईले हरियो टिसर्ट लगाएका छन् । उनी बसेको कोठा सुविधा सम्पन्न देखिन्छ । कतै राजावादी वा पूर्वराजाका समर्थकको घरमा प्रसाईले आश्रय लिएको देखिन्छ । शुक्रबार प्रसाईकै हठका कारण आन्दोलन हिंसात्मक बनेको थियो । उनले जबर्जस्ती गाडी हाँकेर सुरक्षा घेरा तोडेर तीनकुनेबाट नयाँबानेश्वरतर्फ हुइँकिएका थिए ।

तर उनी लक्ष्यमा पुग्न सकेनन् । उनले हाँकेको गाडीले धेरै प्रदर्शनकारी र सुरक्षाकर्मी घाइते बनेका थिए । त्यसपछि नै प्रहरीले राजावादीको भीडतर्फ अश्रुग्यास प्रहार गरेको थियो । घटनामा दुईजनाले ज्यान गुमाएका छन् । विभिन्न स्थानमा लुटपाट र आगजनी, तोडफोडसमेत भएको छ । प्रहरीले प्रसाईको खोजीकार्य जारी रहेको बताए पनि भिडियो सन्देश जारी गर्दै उनले चुनौती दिइरहेका छन् ।

दुर्गा प्रसाईं टाढा छैन । १२ भाइ मिडिया हात धोएर लाग्या छन् । म भागेको छैन, भाग्दिनँ । पुलिस र प्रशासनले मलाई खोज्नुपर्दैन । मलाई गोञ्जालो बनाएर दबाउन खोजिएको छ । त्यसैले सुरक्षितमात्रै बसेको हो । प्रधानमन्त्रीबाटै गोली हान्ने आदेश छ भन्ने सुनेपछि सुरक्षित बसेको हुँ । म भाग्दिनँ । बरु तपाईंहरुकै अगाडि मर्छु ।