रवि लामिछाने फेरि रास्वपा सभापतिको भूमिकामा फर्किँदै, महत्वपूर्ण निर्णय गर्ने

काठमाडौं । साढे पाँच महिनापछि रवि लामिछाने रास्वपाको सभापतिको भूमिकामा फर्किएका छन् । सोमबार बस्ने रास्वपाको विशेष केन्द्रीय कार्यसमिति बैठकबाट रवि सभापतिको भूमिकामा फर्किन लागेका हुन् ।

सहकारी ठगीका विषयमा विभिन्न अदालतमा संगठित अपराध र सम्पत्ति शुद्धीकरणको मुद्दा दायर भएपछि रवि पार्टी सभापतिको भूमिकाबाट निरपेक्ष बसेका थिए । उनले पार्टी कार्यबाहक सभापतिको जिम्मेवारी उपसभापति डोलप्रसाद अर्याललाई दिएका थिए ।सोमबार बस्ने केन्द्रीय कार्यसमितिको बैठकमा कार्यबाहक सभापति अर्याललाई धन्यवाद प्रस्तावको मन्तव्य राख्ने र दोस्रो बैठकको सभापतित्व रवि लामिछानेले गर्ने कार्यवाहक प्रवक्ता मनिष झाले जानकारी दिएका छन् ।

सोमबारको बैठकमा रविले सभापतिको तर्फबाट राजनीतिक प्रतिवेदन भने पेस नगर्ने भएका छन् । कास्की, काठमाडौं, रुपन्देही र चितवन जिल्ला अदालतले रविलाई सहकारी ठगीका विषयमा धरौटीमा छाड्न आदेश दिएपछि उनी सार्वजनिक कार्यक्रममा त्यति देखिएका छैनन् । उनले जिल्ला अदालतहरूले दिएको आदेश बदरको माग गर्दै उच्च अदालतहरूमा निवेदन दिएका छन् । उनले दिएको निवेदनमा अहिलेसम्म सुनुवाइ हुन सकेको छैन ।

रविविरुद्ध अझै पर्सा जिल्ला अदालतमा सानो पाइला सहकारी ठगीका विषयमा मुद्दा दर्ता हुन बाँकी नै छ । तर पनि रवि पार्टीको कार्यकारी भूमिकामा फर्किनुलाई अर्थपूर्ण रूपमा हेरिएको छ । रवि गोरखा मिडिया नेटवर्कको प्रबन्ध सञ्चालक हुँदा विभिन्न पाँच सहकारीको पैसा आफ्नो कम्पनीमा लगिएको भन्दै उनीविरुद्ध सहकारी ठगीको आरोपमा अदालतमा मुद्दा दर्ता भएको थियो ।