वैशाख ७ गतेपछि एन्फा नेतृत्वमा रहेकाहरूको बिदाइ गर्ने गणेश थापाले दिए चेतावनी

काठमाडौं । अखिल नेपाल फुटबल संघ (एन्फा) का पूर्वअध्यक्ष गणेश थापाले आगामी वैशाख ७ गतेपछि एन्फाको नेतृत्वमा रहेका मान्छेहरू सिद्धिने चेतावनी दिएका छन् । आइतबार एक भिडियो सन्देश जारी गर्दै उनले वैशाखमा भ्रष्टाचारमा मुछिएका एन्फा पदाधिकारीहरूको बिदाइ गर्ने र नयाँलाई स्थापित गर्ने उनको चुनौती छ ।

उनले नेपाली फुटबल बचाउन पनि एन्फाको हालको नेतृत्वलाई बिदाइ गर्ने उनले चेतावनी दिएका छन् । भ्रष्टाचारको आरोपमा अन्तर्राष्ट्रिय फुटबल महासंघ (फिफा) को १० वर्षे प्रतिबन्धमा परेका थापा वैशाख ७ गतेपछि मुक्त हुँदैछन् । त्यसकै पूर्वसन्ध्यामा उनले एन्फाका अध्यक्ष पंकजविक्रम नेम्वाङसहितलाई हटाउने धम्की दिएका हुन् ।

थापाले भनेका छन्, ‘एन्फा अध्यक्ष र महासचिवले गणेश थापालाई भन्छन् रे हामी गणेश थापालाई सिध्याइदिन्छौं कारबाही गरेर देखाउँछौ । मलाई के कारबाही गरेर देखाउनुहुन्छ ? म त आफै सिद्धिएको मान्छे हेर्नुुुुस् । जिन्दगीमा आफूले गल्ती गर्दै नगरेको चिजको पनि सजाय भोगेर १० वर्षदेखि पीडा र दुःखमा छु । तर मेरो भनाइ के छ भने नेपाली फुटबल सिद्धिनु भएन । गणेश थापा सिद्धीएर केही फरक पर्दैन । हो त्यसैका लागि अब धेरै लामो समय छैन, वैशाख ७ गतेपछि नेपाली फुटबल बचाउनलाई तपाईहरु जस्तो मान्छे सिद्धिनुपर्छ ।

तपाईहरुले गर्नुभएका आर्थिक अनिमितता, अवैधानिक कार्य र नेपाली फुटबललाई ध्वस्त बनाउनु भएको छ त्यसको छर्लंग आमखेलप्रमीहरुमाझ राखिने छ र तपाईहरुलाई बिदाइ गरिने छ । नेपाली फुटबल बचाइनेछ ।’