काठमाडौँ – गत शुक्रबार राजावादीको आन्दोलनका क्रममा कोटेश्वरस्थित भाटभटेनी सुपरमार्केटमा तोडफोड र लुटपाट भयो । तीनकुने क्षेत्रमा प्रहरीले अश्रुग्यास र गोली चलाएपछि तितरवितर भएका राजावादी समर्थकले मिनबहादुर गुरुङको भाटभटेनी सुपरमार्केटमा लुटपाट र तोडफोड गरेका थिए ।
भाटभटेनीको भवनको केही सिसा फुुटाइएको थियो भने ग्राउन्ड फ्लोरमा रहेको बजारमा लुटपाट भएको थियो । त्यहाँभित्रका केही सामानसमेत लुटपाट भएको थियो । सामाजिक सञ्जाल र मिडियामा प्रकाशित भएका समाचारकै आधारमा प्रहरीले अहिलेसम्म भाटभटेनीमा लुटपाट गर्ने १६ जनालाई पक्राउ गरिसकेको छ ।
आफ्नो डिपार्टमेन्टल स्टोर लुटपाट र तोडफोड भएपछि मिनबहादुरले विभिन्न मिडियालाई संक्षिप्त टिप्पणी दिँदा ७५ करोड बराबरको क्षति भएको विवरण दिए । जबकि त्यहीँ उनले घडी, मोबाइल, फलफूल, जुस, वियर र रक्सी लुटिएको भनेका छन् । केही सामान तोडफोड हुँदा ७५ करोडको क्षति हुन्न ।
किनकि भाटभटेनी निर्माण गर्न पनि ७५ करोड लागेन होला । मिनबहादुरले हचुवाका भरमा ७५ करोडको क्षति भएको अभिव्यक्ति दिएपछि उनलाई नै ब्याक फायर भएको छ । उनको सामाजिक सञ्जालमा तीव्र आलोचना भइरहेको छ । हिजोसम्म सहानुभूति दिने मानिसहरू पनि उनको उछितो काढ्न थालेका छन् । थोरै क्षति हुँदा पनि धेरै क्षतिको विवरण देखाएर बिमाको क्लेम गर्न मिनबहादुरले यस्तो झुट बोलेको हुनसक्ने धेरैको अनुमान छ ।
मालिक मिनबहादुरको अभिव्यक्तिको चौतर्फी आलोचना भएपछि भाटभटेनीले शुक्रबारको तोडफोड र लुटपाटबाट ८० लाखभन्दा बढीको क्षति भएको धारणा सार्वजनिक गरेको छ । भाटभटेनीका सीओओ पानु पौडेलका अनुसार ६४ लाख ८८ हजार ३३७ रुपैयाँ बराबरको सामग्री लुटपाट भएको छ ।
भाटभटेनीका बाहिरी भागमा रहेका धेरैजसो सिसा फुटेका छन् । त्यसबापत ११ लाख ८५ हजार ८५५ रुपैयाँको क्षति भएको प्रारम्भिक अनुमान रहेको उनले बताए । दुई लाख ६५ हजार रुपैयाँका शो–केश तथा अन्य सामग्रीमा क्षति पुगेको छ । काउन्टरमा रहेका ९४ हजार रुपैयाँ पनि लुटपाट गरिएको पाइएको छ ।
प्रतिक्रिया