काठमाडौं – तीनकुने क्षेत्रमा भएको राजावादीहरूको आन्दोलनका कमान्डर दुर्गा प्रसाईंलाई चार दिनसम्म पनि प्रहरीले पक्राउ गर्न सकेको छैन । फरार रहेका प्रसाईं भने सामाजिक सञ्जालमा सक्रिय छन् ।
शुक्रबार आन्दोलनबाट निस्किएर ललितपुरको इमाडोल पुगेका प्रसाईं त्यहाँबाट भूमिगत भएका थिए । शुक्रबार साँझदेखि प्रहरीका विशेष टोलीहरू परिचालित भए पनि उनलाई पक्राउ गर्न असफल रहे । बरु उनले सामाजिक सञ्जालमा घटनाको दोष सरकारलाई नै दिइरहेका छन् ।
आइतबार सामाजिक सञ्जाल फेबसुकमा भिडियो पोस्ट गर्दै उनले आफू काठमाडौंकै एक मन्दिरमा बसेको बताए । आफूलाई भेटेलगत्तै गोली हान्न प्रधानमन्त्री केपी ओलीले निर्देशन दिएकाले सुरक्षाका लागि लुक्नुपरेको उनको दाबी छ । सामाजिक सञ्जालका आधारमा प्रहरीले उनलाई ‘ट्रयाक’ गर्न सकेको छैन ।
‘फेसबुक ट्रयाक गर्न मेटा कम्पनीले नै सघाउनुपर्ने हुन्छ,’ एक प्रहरी अधिकारी भन्छन्, ‘तर, हाम्रो देशमा उनीहरूको कार्यालय नभएकाले उनीहरूले हत्तपत्त विवरण दिँदैनन्, त्यही कारण उनलाई पक्राउ गर्न गाह्रो भइरहेको छ ।’ आन्दोलनका दिनमा पनि उनले आफैँ गाडी चलाएर प्रहरीलाई समेत धकल्दै निषेधित क्षेत्र तोड्नुका साथै आन्दोलनकारीलाई उत्तेजित बनाएका थिए । उनले योजनाबद्ध रूपमा आन्दोलनलाई हिंसात्मक बनाएको प्रहरीको दाबी छ । तर पनि उनलाई किन नियन्त्रणमा लिन सकिएको छैन भन्ने जिज्ञासा उत्पन्न भएको छ ।
धेरैले राज्यसत्ताले नै प्रसाईलाई उन्मुक्ति दिएको अनुमान गरेका छन् । किनभने एक हजार प्रहरीको बीचबाट फरार रहेर प्रसाईले काठमाडौं उपत्यका छाड्नुलाई अर्थपूर्ण मानिएको छ । आन्दोलनलाई हिंसात्मक बनाएका प्रसाई शुक्रबार दिनभर तीनकुने क्षेत्रमा सटरमा लुकेर बसेका थिए । तर पनि उनी प्रहरीको नजरमा पर्न सकेनन् ।
शनिबार र आइतबार पनि उनको मोबाइल फोन चालू नै थियो । उनले सामाजिक सञ्जालबाटै भिडियोसमेत पोस्ट गरे । तर प्रहरी हेरेको हे¥यै भएका छन् । प्रसाईले देश छाडे पनि राजावादी समूह भने नयाँ शिराबाट आन्दोलन गर्नुपर्ने निष्कर्षमा पुगेका छन् । त्यसैले तितरवितर भएका राजावादी समूह अहिले जगमान गुरुङको नेतृत्वमा गोलबन्द हुने तयारीमा लागेका छन् । संयुक्त जनआन्दोलन समितिका संयोजक नवराज सुवेदी नजरबन्दमा परेपछि गुरुङलाई आन्दोलनको नेतृत्व दिइएको हो ।
प्रतिक्रिया