ओली पहिलोचोटि आफ्नो पार्टी कार्यालयमा आएपछि माधव नेपाल दंग

काठमाडौँ । प्रधानमन्त्री केपी ओली पहिलोपटक आलोकनगरस्थित एकीकृत समाजवादीको पार्टी कार्यालयमा पुगेका छन् । वरिष्ठ पत्रकार तथा लेखक कमल कोइरालालाई अन्तिम श्रद्धाञ्जली दिन प्रधानमन्त्री ओली सोमबार एकीकृत समाजवादीको कार्यालयमा पुगेका हुन् ।

ओलीले कोइरालाको पार्थीव शरीरमा राष्ट्रिय झन्डा ओढाएका थिए । प्रतिनिधिसभा बैठकमा सम्बोधन गरेपछि प्रधानमन्त्री ओली सिधै एकीकृत समाजवादीको केन्द्रीय कार्यालयमा पुगेका थिए । प्रधानमन्त्री ओली पुग्दा एकीकृत समाजवादीका अध्यक्ष माधवकुमार नेपाल, महासचिव घनश्याम भुसाललगायतका नेताहरू पनि थिए । ओलीले केही बेर एकीकृत समाजवादीका शीर्ष नेताहरूसँग भलाकुसारी गरे । साथै, कार्यालयभित्र पसेर राजावादीको आन्दोलनका क्रममा भएको आगजनीबाट पुगेको क्षतिको पनि अवलोकन गरेका थिए ।

एकीकृत समाजवादी एमालेबाट विभाजित भई तीन वर्षअघि खुलेको पार्टी हो । ओलीले सार्वजनिक कार्यक्रममा एकीकृत समाजवादीलाई पार्टीको मान्यता नै दिने गरेका छैनन् । माधवकुमार नेपालसहितले एमालेबाट विद्रोह गरी २०७८ भदौ २ गते निर्वाचन आयोगमा एकीकृत समाजवादी दर्ता गरेका थिए । एकीकृत समाजवादी पार्टीको कार्यालयमा ओलीले पहिलोपटक पाइला टेकेपछि दुई दलबीच सम्बन्ध सुधारको संकेत देखिएको छ । संसद्मा पेस भएको पाँचवटा प्रतिस्थापन विधेयकमा एकीकृत समाजवादीको सहयोग ओलीले खोजेका छन् ।