काठमाडौं । वरिष्ठ पत्रकार एवं राजनीतिज्ञ कमल कोइरालाको निधनमा उनलाई श्रद्धाञ्जली दिन एकीकृत समाजवादीको पार्टी कार्यालय आलोकनगर पुगेका प्रधानमन्त्री केपी ओली र माधवकुमार नेपालबीचको ‘ह्यान्डसेक’ लाई लिएर अहिले अनेकथरी अनुमान गर्न थालिएको छ ।
सोमबार ओली र नेपालबीच एकीकृत समाजवादीको पार्टी कार्यालयमा राम्रै भलाकुसारी भयो । कोइरालाको पार्थीव शरीरमा अन्तिम श्रद्धाञ्जली दिएपछि ओलीले पूर्वएमाले नेताहरूसँग लामो कुराकानी गरे । अहिलेसम्म दुवै दलका नेताहरूबीच यसरी खुलस्त कुराकानी भएको थिए ।
प्रधानमन्त्री ओलीसँग माधव नेपाल, झलनाथ खनाल, घनश्याम भुसाल, भीम रावललगायतका नेताहरूले कुराकानी गरेका थिए । पूर्वएमाले नेताहरूबीचको कुराकानीको साक्षी थिए माओवादी वरिष्ठ उपाध्यक्ष नारायणकाजी श्रेष्ठ । श्रेष्ठ उनै हुन् जसले ओली र माओवादी अध्यक्ष पुष्पकमल दाहाल प्रचण्डबीच आफ्नो निवासमा भेट गराएर एमाले र माओवादीबीच एकता गराएका थिए ।
ओली र माधवबीच सोमबारको ‘ह्यान्डसेक’ लाई एकीकृत समाजवादीका नेता प्रकाश ज्वालाले ‘आइस ब्रेक’ को संज्ञा दिएका छन् । उनले सामाजिक सञ्जाल फेसबुकमा ओली र एकीकृत नेताहरूबीचको छलफलको तस्बिर सेयर गर्दै भविष्यमा दुई दलबीच एकता वा सहकार्य हुने संकेत गरेका छन् ।
एमाले विभाजन गरेर एकीकृत समाजवादी गठन गरेयता माधव नेपालसँग ओली निकै रुष्ट छन् । सार्वजनिक कार्यक्रममा पनि ओलीले उछितो काढ्ने गरेका छन् । तर पछिल्लो केही समययता ओली माधव नेपालप्रति कठोर देखिएका छैनन् । खासगरी गत उपनिर्वाचन र स्थानीय तहको निर्वाचनको परिणामपछि ओलीले माधव नेपालप्रति सफ्ट कर्नर अपनाउँदै आएका छन् । माधव पनि ओली र एमालेसँग आक्रोशित देखिएका छन् । आफूहरूबीचको बेमेलको फाइदा माओवादीले उठाएकोमा ओली प्रस्ट छन् । त्यही भएर निकट भविष्यमै दुई दलबीच एकताको प्रयासबारे कुराकानी भएमा आश्चर्य नमान्दा हुन्छ ।
प्रतिक्रिया