तीनकुनेमा राजालाई बोक्न होइन, शीर्ष नेताप्रति आक्रोश पोख्न जनता आएका हुन् : रवि लामिछाने

काठमाडौं । राष्ट्रिय स्वतन्त्र पार्टीका सभापति रवि लामिछानेले चैत १५ गते तीनकुनेमा जम्मा भएका मानिस राजालाई विश्वास गरेर नभई शीर्ष नेताप्रतिको आक्रोशले सडकमा आएको बताएका छन् ।
साढे पाँच महिनापछि रास्वपा सभापतिको जिम्मेवारी सम्हाल्न सोमबार पार्टी कार्यालय वनस्थलीमा जम्मा भएका नेता, कार्यकर्ता र समर्थकलाई सम्बोधन गर्दै उनले आफ्नो पार्टी कुनै पनि कित्तामा नभएको स्पष्ट पारे ।

‘रास्वपा जनता आगो बलेको छ, त्यता ताप्ने पार्टी होइन’, उनले भने । सहकारी ठगी र सम्पत्ति शुद्धीकरणको मुद्दा खेपिरहेका उनले शनिबार चितवनबासीलाई सम्बोधन गर्ने बताए । आफू निर्वाचित भएको चितवन–२ मा आमसभा गरेर रविले अघिल्लो सरकार ढलेर रातारात नयाँ सरकार बन्नुको कारण खुलासा गर्ने बताएका छन् । उनले आफू किस्तीमा आएको प्रधानमन्त्री पद त्यागेर कैदी हुन तयार भएको दाबी पनि गरे ।

रविले सरकारले आफ्नो मौनताको फाइदा उठाएको पनि बताएका छन् । सरकारकै कारण मौनता भंग गरेको उनको भनाइ थियो । आफ्नो मौनताको फाइदा उठाउँदै सरकारले टाउकोमाथि तरबार झुण्ड्याएजसरी एउटा जिल्लाको मुद्दा अदालतमा पेस नै नगरी राखेको उनको भनाइ थियो । ‘मैले सोचेको थिएँ केही समय अझै शान्त बसौं । तर सरकारले यसको फाइदा उठाउँदै टाउकोमाथि तरबार झुण्ड्याउँछु भनेर एउटा जिल्लाको अदालतमा त मुद्दासमेत नबुझाएर राखेको छ,’ उनले भने ।

आफू जनसुकै शक्तिसँग पनि लड्न तयार रहेको बताउँदै लामिछानेले वर्तमान सरकारको लुटलाई टुलुटुलु हेरेर नबस्ने दाबी गरे । ‘यिनलाई लागेको छ होला यसको टाउकोमाथि एउटा तरबार राख्यो भने चुपचाप बस्छ, यो डराउँछ । कुनै पनि बेला शिरमाथि लागेको तरबार खसाल, म थाप्न तयार भएर बसेको छु,’ उनले भने ।