काठमाडौं – एमाले नेता गोकुल बासकोटाले विवादास्पद मेडिकल व्यवसायी दुर्गा प्रसाईलाई भष्मासुरको संज्ञा दिएका छन् । चैत १५ गते तीनकुनेमा ताण्डव देखाएर अलप भएका प्रसाईले पटकपटक सामाजिक सञ्जालमार्फत सरकार र दलका नेतालाई चुनौती दिन थालेपछि प्रसाईले मंगलबार बिहान उनलाई भष्मासुरको संज्ञा दिएका हुन् ।
राजसंस्था पुनःस्थापना गर्छु भन्दै राजावादीलाई सडकमा उतारेर दुईजनाको ज्यान गएको र अर्बौको क्षति भएको हिंसात्मक आन्दोलनले नपुगेर प्रसाई अहिले पूर्वराजा ज्ञानेन्द्र्र शाहसँग मिलेर अर्को वितण्डा मच्चाउन खोजिरहेको भन्दै उतले आक्रोश व्यक्त गरेका छन् । राजावादीहरू अहिले त्यही आशामा बसेको भन्दै कटाक्ष गरेका छन् ।
भष्मासुरले सबैको टाउकोमा हात राख्न खोज्दैथ्यो, अहिले मन्दिरतिर नाच्दै रहेछ। भगवान विष्णुसँगै ननाच्दासम्म यसको वितण्डा अझै चल्ने आशामा छन् प्रेतात्माहरु,’ बासकोटाले सामाजिक सञ्जालमा लेखेका छन् । गत शुक्रबारका तीनकुने घटनापछि दुर्गा प्रसाई भूमिगत भएका छन् ।
हजारौं प्रहरीको आँदा छल्दै बेपत्ता भएका उनले पटकपटक सरकार र दलका नेतालाई चुनौती दिएका छन् । उनले सोमबार राति पनि भिडियो सन्देश जारी गर्दै आफू काठमाडौंमै रहेको र आन्दोलनको आँधीबेहेरी सिर्जना गरेर सबैलाई बगाउने चुनौती दिएका छन् ।
प्रसाईलाई पूर्वराजा ज्ञानेन्द्र शाहले निर्मल निवास बोलाएर आन्दोलनको जनकमान्डर तोकेका थिए । तर, प्रसाईकै सनकका कारण राजावादी आन्दोलन मत्थर हुन पुगेको छ । प्रसाईका सहयोगी र समर्थक धमाधम पक्राउ पर्न थालेपछि अब राजावादीको आन्दोलन तुहिने सम्भावना बढेको छ । तर पनि राजावादीहरू प्रसाई र पूर्वराजा मिलेर राजसंस्था ल्याउने झिनो आशमा बसेका छन् ।
प्रतिक्रिया