शुक्रबार भएको राजावादी आन्दोलनका क्रममा कोटेश्वरस्थित भाटभटेनी सुपर मार्केटका एक सुरक्षागार्डले लाठीले कुटेर लुटेराहरूलाई लखेटेको भिडियो अहिले सामाजिक सञ्जालमा निकै नै भाइरल छ। शुक्रबार साँझदेखि नै उक्त भिडियो भाइरल भैरहेको हो । ती गार्डको हिम्मतलाई सबैले सम्मान गर्दै मन पराइरहेका छन्।
पहिले नै घोषित कार्यक्रमअनुसार चैत १५ गते राजावादीले तीनकुनेमा प्रदर्शन गरेका थिए । उता कोटेश्वरको भाटभटेनी अन्य दिन जस्तै खुल्लै थियो। राजवादीको प्रदर्शनकै कारण अन्य दिन जस्तो सो दिन ग्राहकको भीड भने थिएन। तर, करिब ३ बजेपछि एकाएक २५ जना जतिको हुलले भाटभटेनी तोडफोड गर्न लाग्यो। भाटभटेनीमा ढुंगामुढा बर्साउन थाल्यो। भवनका सिसा फुटाउनुका साथै भाटभटेनी हातामा राखिएका सवारी पनि फोड्न थाले।
प्रदर्शनकारी एकाएक आक्रामक बनेर आएपछि गार्डलगायत त्यहाँको व्यवस्थापन पछि सर्यो। किनकि त्यतिखेर प्रहरी प्रशासन त्यहाँ थिएन। कसैले जोखिम मोलेनन्। तोडफोडको केहीबेरमा भाटभटेनीमा लुटपाट मच्चियो।
सबै सुरक्षा गार्डहरू साइड लागेर हेरेर बसिरहेका थिए। तर, लुटपाट नै मच्चिन थालेपछि भाटभटेनीका गार्डमध्येका एक कृष्णप्रसाद पराजुलीले नजिकै रहेको लठ्ठी उठाएर त्यहाँ लुट्न आउनेलाई हान्न थाले। उनै पराजुलीले लठ्ठी नै भाँचिने गरी लुटपाटकर्तालाई हानेको र भगाएको भिडियो सामाजिक सञ्जालमा निकै भाइरल भयो। ‘पहिले ढुंगामुढा गर्न थाले। सुरुमा नै सबैजना मिलेर लाठीले हान्न खोजेका थियौं। तर, उनीहरूले ढुंगामुढा गरेपछि हामी पछि सर्यौं। सुरुमा ज्यान जोगाउन लुकेर बस्यौं।
ढुंगामुढा भएको केहीबेरमा सबैले भाटभटेनी भित्रबाट सामान ओसार्न थाले। त्यसपछि ल भएन भनेर लठ्ठी लिएर मैले हान्न थालेँ,’ उनले भने। अन्य साथीहरूलाई पनि लिएर आएका पराजुली आफू बाहिर बसे भने अन्य ४ जनालाई सुपरस्टोर भित्र पठाए। भित्रबाट अन्य गार्डले लठ्ठीले पिट्दै लुटपाट गर्नेलाई बाहिर निकाले भने पराजुलीले बाहिर नै भटाभट हाने। उनको लठ्ठी भाचिँदा पनि उनले लुटपाटकर्तालाई भगाउन छोडेनन्। भाँचिएको लठ्ठीले पनि २–४ जनालाई हानेर भगाएको भाइरल भिडियोमा देख्न सकिन्छ। उनका अनुसार केहीबेरमा त्यहाँ प्रहरी प्रशासन आयो र स्थिति सामान्य भयो।
राजावादी आन्दोलनका क्रममा भएको लुटपाटको क्रममा साहसिक काम गर्ने सुरक्षा गार्ड कृष्णप्रसाद पराजुली लगायत सुरक्षा गार्ड र कर्मचारीलाई भाटभेटनी सुपरमार्केटले सम्मान गर्ने भएको छ ।
सुपरमार्केटमा तोडफोड तथा लुटपाट गरिरहेको समयमा कर्तव्य निर्वाह गर्दै अग्रपंंक्तिमा खटिएका कर्मचारी तथा व्यापारलाई निरन्तरता दिन रातभर मर्मत सम्भारमा लाग्न खटिएका कर्मचारीलाई सुपरमार्केटले सम्मान गर्ने भएको हो । यसका लागि बुधबार बिहान सम्मान कार्यक्रम राखिएको छ ।
उक्त घटनाका क्रममा करिब ८० लाख रुपैयाँ बराबरको क्षति भएको कम्पनीले जनाएको छ । त्यसमध्ये ६४ लाख ८८ हजार बराबरको सामान लुटिएको बताइएको छ । उक्त घटनापछि पनि शनिबार बिहानदेखि नै सुपरमार्केट सञ्चालनमा आएको थियो । यसका लागि सरसफाइ लगायत कर्मचारीले रातभर काम गरेका थिए ।
प्रतिक्रिया